Martine - Bare så du vett det

Martine Frotveit Johnsen tok seg heilt til det som, etter tidlegare reglar, ville vore semifinale i Idol.

Men då juryen i går skulle redusera frå 30 til 15, gjekk ikkje 17-åringen frå Strøno vidare.

– Eg er glad for opplevinga eg fekk. Eg har lært ein del, og det har gjeve meg inspirasjon til å synga meir og å publisera meir, sa Martine til Midtsiden onsdag kveld.

Frå før har ho nokre låtar liggande ute på både Instagram og Youtube, i tillegg til det som no ligg på TV2.no.

• Les òg: Intervju med Martine frå før Idol starta

Martine seier ho allereie har fått fleire førespurnadar om å synga for ulike selskap.

I fjor stilte ho opp for mamma Eirin Frotveit og kjærasten Jørn Danielsen, då dei i starten av september gifta seg i Os kyrkje.

– Rørande og fint

Martine song den rolege versjonen av Stavangerkameratene sin store hit, «Bare så du vett det», saman med storesøster Malin. På trompet er Helge Haukås.

Då Midtsiden før Osfest intervjua Ole Alexander Mæland frå Stavangerkameratene, fekk han sjå videoen av korleis Idol-deltakaren tolka låten frå Stavanger.

– No blei eg rett og slett smårørt over kaffibordet her. Dette var nydeleg sunge! Det var også fint å høyra ein versjon med trompet, sa Ole Alexander, som sa han ville spela videoen også for dei andre kameratane.

Midtsiden har fått lov å visa ein lett komprimert versjon av ein privat video frå songen i kyrkja. Sjå i ruta øvst i artikkelen.