Marsj i strålande sol
Bildeserie: Etter ein litt overskya laurdag med "få" deltakar skinte sola og deltakartalet på Ulvenmarsjen opp sundag.
Bildeserie:
"Berre" 157 deltakarar laurdag gjorde at arrangørane var litt uroa for korleis dette ville gå før sundagens marsj.
- Folk har nok truleg sett på vêrmeldingane og utsatt deltakinga til sundag.
- Vi blei litt urolege når det ikkje var fleire en 157 som tok turen laurdag, men det hadde vi ingen grunn til, slår Erling Andersen i arrangørklubben Søfteland Turn og Idrettsforening fast.
Då midtsiden snakka med han omlag klokka ett søndag hadde dei sendt 429 deltakarar ut i den 14 km lange løypa frå Os ungdomskule, via Tøsdalsskiftet, over Industrivegen og Ulvensletta til drikke og matstasjonen ved Nore Neset skule. Derfrå straka vegen heim igjen via Skeie, Solbakken og Moberg.
OPPDATERT: Deltakarantalet enda til slutt på 437 deltakarar, 11 fleire enn i fjor. Den eldste deltakaren var 87 år.
Lite google-vennleg
Då Ulvenmarsjen feira 10-årsjubileum starta dei opp med kunnskapskonkurranse parallelt med løpet. For annankvar kilometer står ei oppgåve med meir eller mindre vanskelege spørsmål.
- Etterkvart som mobiltelefonar med nettlesarar breidde om seg blei det vanskelegare å vanskelegare å lage oppgåver.
- Det var nok mange som nytta google og andre sider for å finne ut kva svara var, fortel Andersen.
I år hadde difor arrangørane lagt seg i selen for å laga spørsmål ein ikkje fann svar på på nettet.
Kven av Erling Andersen og Einar Vevatne har størst sko? er eit døme på spørsmåla sundag.
Seks vinnarar kvar dag
Tidlegare fekk alle som hadde alt rett på spørsmåla kvar si T-skjorte i premie.
- Det har vi gått vekk frå. Det var umogleg å bereikna kor mange T-skjorter vi trengde.
- I år trekk vi difor ut seks vinnarar frå kvar av dagane i staden, forklarar Andersen, som første gong i historia ikkje har vore med på å utforme oppgåvene.
Då Midtsiden snakka med han var det berre ein som hadde klart alt sundagen, medan 22 hadde alt rett laurdagen.
Pers av Sælen
Ulvenmarsjen er ikkje berre ein turmarsj, men òg eit kappgangstemne.
- Det var diverre berre seks deltakarar med i dag.
- Men prestasjonen til Joakim Sælen er ikkje desto mindre. Han persa med sju minutt då han gjekk inn på 1.10.58 på den 15 km lange løypa, fortel Andersen.
Kappgjengarane gjekk ei ekstra sløyfe ned mot Kysthospitalet for å koma opp i totalt 15 kilometer.