Markerte seg på kretslaget
I helga var 6 osingar fordelt på 4 kretslag i Sogndal og spelte kampar. Ole Martin Lekven Kolskogen (t.h.) skåra tre - men fekk seg òg ein liten lærepenge.
Bildeserie:
I helga var Vilde Drange Veglo, Madelen Holme, Oscar Lekven Fimreite, Knut Jordal, Tobias Nøss og Ole Martin «Olis» Lekven Kolskogen i Sogndal med kretslaga for gutar og jenter fødd i 2001 og 2002.
Les òg: Knut, Oscar og Vilde tatt ut på kretsen
Spelarane budde på Fosshaugane Campus der Hordaland sine U14- og U15-lag spelte mot Sogn og Fjordane både laurdag og søndag.
Laga frå Hordaland gjorde det bra, vann 6 av 8 kampar (2 uavgjorte). Spelarane frå Os gjorde god figur.
Kaptein og målskårar
Madelen Holme er fødd i 2002, men er kaptein på 2001-laget.
Ho sette inn det siste målet då Hordaland vann 6-0. Den andre kampen enda med 4-0-siger (vi har ikkje målskårarane frå denne kampen).
Vilde Veglo speler på 2002-laget. U14-laga er førsteårs kretslag og hadde sine første kampar denne helga etter å ha trent saman sidan november.
– Vilde har veldig god fart og driv, ho er skjerpa og har kome langt i forhold til alderen når det gjeld å ha forståing for spelet, seier trenar Pål Hansen.
Vilde sette inn 3-0 og 8-1 då Hordaland vann første kamp 10-1. Den andre kampen enda 2-2.
– Vi spelte med og mot det same laget søndag. Vi prata før kampen at sogningane nok ville gje oss betre motstand i neste kamp, men at det blei 2-2 var litt overraskande.
Olis skåra begge då Hordaland vann 2-1
I gutar 15-klassen blei det 2-1 første dag. Ole Martin Kolskogen sette begge måla.
– Spelarane våre skal få ei evaluering frå kampane, så eg vil ikkje seia så mykje i avisa enno, forklarer trenar Nils Kristian Flatøy.
– Men eg kan fortelja såpass at vi ser på Ole Martin som ein som er veldig god på å lausriva seg frå forsvarsspelarar og ein som har solide avsluttingsferdigheiter.
Kolskogen skåra òg då Hordaland søndag vann 4-1.
– Det kunne blitt to mål også søndag, i staden blei det ein liten lærepenge. Olis blei felt og insisterte på å ta straffen sjølv. Den sette han nokre meter utanfor, og han var sjølv med på at vi kunne konstatera at blir du tatt så bør som oftast nokon andre ta straffen, humrar Flatøy.
Med seg på kretslaget hadde Kolskogen kameraten Tobias Nøss frå Os. Nøss var ny på kretslaget i vinter.
– Tobias gjorde eit fantastisk forarbeid på 1-0-skåringa, måten han tredde gjennom på var frispeling av høg klasse.
I gutar 14-klassen spelte Oscar Lekven Fimreite og Knut Jordal. Dei spelte 3-3 laurdag og vann 2-1 søndag.
Ny samling i mai
Når serien startar er det slutt på kretstreningane, som har gått éin dag i veka gjennom vinteren.
– Det blir nok enkelte helgesamlinger så vi held kontakten fram mot neste samling, 27. til 29. mai når vi skal spela mot Rogaland på Bremnes, seier Pål Hansen.
Resultat frå kampane
På haugenfotball.no kan du sjå kampdetaljar og mange fine bilde frå kampane.
Laurdag 20. februar
G2002 Sogn og Fjordane - Hordaland: 3-3
G2001 Sogn og Fjordane - Hordaland: 1-2
J2002 Sogn og Fjordane - Hordaland: 1-10
J2001 Sogn og Fjordane - Hordaland: 0-6
Søndag 21.februar
G2002 Sogn og Fjordane - Hordaland: 1-2
G2001 Sogn og Fjordane - Hordaland: 1-4
J2002 Sogn og Fjordane - Hordaland: 2-2
J2001 Sogn og Fjordane - Hordaland: 0-4