Maritim timeplan

Bildeserie:

Full skjerm

1 av 15

- Eg kan ikkje hugsa når vi arrangerte maritim veke fyrste gong, men vi har hatt det i mange år, fortel klassekontakt for 4. klasse, Bjarne Lund.

Fiska frå båt og kai

Lund er saman med 4. klasse og fiskar med stang frå kaien på Bunnpris. Butikksjef Inglaug Brimsholm har vore ute med bollar og frukt til elevane.

- Sjå, eg har fått noko! ropar ein ivrig elev og drar opp ei sjøstjerne.

Blant fangsten på kaien var det både sjøstjerne, fisk og strømpar.

På ein annan kai, ved Hargun, kjem 5. klasse inn etter å ha vore ute i båt og dratt garn og fiska. Fisk fekk dei, og fleire av elevane fekk vera med å sløya fisken på land.

Interessa for kva som var inni fisken var stor, og dei tok vare på både auge og hjarte.

Omvising på Inka

1. klasse var tysdag på besøk hos Inka AS, som driv med foredling av laks og aure. Produksjonsjef Kristin Vedholm serverte bollar og saft og så fekk dei vera med på omvising på fabrikken. Nokre av elevane syns det lukta litt vondt medan andre syntest det lukta deilig.

- Det er veldig kjekt å ha elevane på besøk, seier Vedholm.

Å få lov å koma inn på fryserommet, der det er 29 minusgradar, var noko av det kjekkaste, meinte elevane.

Samarbeid mellom skule og foreldra

- Maritim veke er eit initiativ som blei starta etter eit ønske frå foreldra, fortel Grete Hatvik, klassekontakt for 1. klasse.

Det er eit samarbeid mellom skulen og foreldra, der foreldra stiller med båtar, utstyr og kompetansen.

- Båt- og sjøliv har jo alltid vore ein stor del av livet til dei som bur her i Øyane.

- Vi hadde aldri kunna hatt eit sånt opplegg uten foreldra.

Os og Kobbavågen

I tillegg til besøk på Inka, fisking og garn har elevane fått prøva seg i kajakk, vore på krabbejakt i Kobbavågen, hatt teori, vore på besøk i Oselvarverkstaden, og fått omvising på fiskebåten Røttingøy.

I tillegg har 4. klasse hatt livredningskurs i Osbadet.

- Noko av programmet er det berre nokre klassar som har, men i løpet av dei 7 åra dei går her på skulen så skal alle fått vore med på alt, seier Hatvik.

- Maritim veke er kjempegøy, kjem det samrøystes frå elevane.