Mann sparka i svime av kvinne
Politiet fortel om funn av sprøyter på leikeplass, funn av død svane og mann til Haukeland etter «frispark» av kvinne.
Klokka 01.23 natt til laurdag fekk politiet melding om bråk på ein utestad i Os sentrum. Ein mann blei skadd då ei kvinne sparka han i hovudet.
– Det hadde vore noko bråk ved utestaden og vaktane greip inn. Ein mann som var lagt i bakken skal ha blitt sparka i hovudet av ei kvinne, fortel operasjonsleiar Arve Samsonsen.
Mannen besvimte av sparket. Han blei sendt til Haukeland universitetssjukehus for sjekk mens kvinna, som er i 20-åra, blei køyrd til Bergen for overnatting i arresten.
Stoppa bil med fleire feil
Tidlegare på kvelden, klokka 23.36, blei ein bil stoppa på Byvegen.
– Det blei funne feil på både lys og dekk og førar fekk forelegg, fortel Samsonsen.
Fann brukte sprøyter på Nore Neset
Ved ein leikeplass på Nore Neset blei det litt før klokka 14 fredag funne brukarutstyr.
Nokon hadde funne nokre brukte sprøyter og politiet seier dei vil trappa opp patruljeringa i området.
Svane sto fast i gjerde
I 13-tida fredag fekk politiet melding om funn av død svane.
Svana hadde sete seg fast i eit gjerde på Tøsdal. Politiet fekk ein viltkontakt til å ta hand om den døde fuglen.