Mange vil bli næringssjef i Os

Tysdag gjekk søknadsfristen på den nyoppretta stillinga som næringssjef i Os kommune ut.

– Interessa for stillinga har vore veldig stor. Vi har nok hatt ein stad mellom 20 og 30 telefonar frå interessenter. Kor mange av dei som faktisk har søkt har eg førebels ikkje oversikt over.

Les òg: Vil tilsetta næringsutviklar

– Rådgjevarane våre hos Headvisor arbeider no med å systematisera søknadene og få stadfesta at alle opprettheld søknaden sin. Det er jo slik i stillinger som denne at nokre av kandidatane ønskjer ei stadfesting på at dei er aktuelle før dei opprettheld søknaden. Det er jo gjerne slik at dei er i ein jobb i dag og ikkje ønskjer offentleggjort at dei har søkt om dei ikkje er aktuelle. Då vel dei heller å trekke søknaden, forklarar rådmann Christian Fotland i Os kommune.

Vidt spekter

Rådmannen kan likevel røpa litt om søkjermassa.

– Det eg kan seie er at det er eit vidt spekter av kompetanseområder og -felt blant søkarane. Det er òg søkarar i alle aldre og av begge kjønn.

– No er ordføraren på reise mykje av denne veka, så vi får ikkje snakka saman denne veka, men vi har planlagt å samle oss over helga for å ta ei oppsummering.

– Eg er heilt trygg på at vi kjem til å finna ein god kandidat til stillinga, avsluttar Fotland.