Malte frå Afghanistan

Christopher Rådlund er svensken som gjorde nordmann av seg i byrjinga av 90-talet, og som gjekk på kunstakademiet i Oslo.

Som ein protest mot avantgardismen tok Rådlund eit val om å konsentrera seg om landskap.

– Då eg gjekk på kunstakademiet var det eit evig mas om å skulla vera nyskapande. Eg syntest det var meir morosamt å mala meir tradisjonelt og gje landskapsmaleria ein renessanse, fortel Rådlund medan han heng opp utstillinga i Hvelvet på Oseana.

Ei veke i Afghanistan

For eit par år sidan tilbrakte Rådlund ei veke saman med dei norske soldatane i Afghanistan.

– Eg fekk naturleg nok ikkje lov til å dra ut av leiren, men eg lagde skisser der nede og tok fleire bilde som eg nytta som utgangspunkt då eg kom heim.

– Eitt av bilda blei mi tolking av korleis soldatane hadde det ute på post. Nokon vil kanskje dra paralleller til Theodor Kittelsen sitt Soria Moria. Eg prøver i min versjon å skildra kor vanskeleg oppdrag soldatane hadde der nede gjennom den relativt komplekse landskapen.

– Tilbakemeldingar eg har fått etter at utstillinga hang på Forsvarsmuseet er at det var akkurat slik det var, seier kunstnaren, som òg har jobba med Forsvaret på meir heimleg territorium, på Setermoen i Troms.

Symbol på fridom

– Eg er eigentleg ikkje interessert i våpen, men prøver å formidla det eksistensielle i situasjonen. Det er meir dystert enn spennande. Saman med dei andre bilda av landskapen og skyene føler eg denne utstillinga står godt til kvarandre.

– Forsvaret si oppgåve er å verna om demokratiet og fridomen. Landskapa representerer på mange måter kjensla av fridom, forklarer Rådlund før fleire bilde blir hengd opp på veggen.

PS! Går du med ein 20-kroning i lomma er det ikkje usannsynleg at det er Rådlund som har utforma motivet på baksida. Han fekk nemleg i oppdrag å designa mynten til Høgsterett sitt 200-årsjubileum i 2015.