Må selja 28 pc-ar

Oppdatert, dette er APRILSNARR:

Måndag var det nyopning etter oppussing og ombygging på rådhuset, og det er ikkje berre helsestasjonen og kundetorget som har blitt ny.

- Vi har fått kabla opp til fleire sendarar sånn at det no endeleg er trådlaus nettverk i heile huset, seier Simen Soltvedt, rådgjevar for digitale tenester i Os kommune.

Går over til Apple

Med nytt trådlaust nett er det også duka for ny maskinpark. Os kommune vurderte først å gå over til «steintavlene» som lokalpolitikarane bruker, men han no bestemt seg for iPad 2.

- Når vi ser kva iPad har blitt så må vi innrømma at vi nok var litt raske med å kasta oss over desse pc-ane med touchscreen. No har vi hatt full gjennomkjøring av iPad, som også politikarane i løpet av året skal over på, men vi startar med nokre av oss i administrasjonen.

- Men utskiftinga blei litt dyrare enn vi først hadde trudd.

Kvalitetsmaskiner på billigsal

Administrasjonen hadde i utgangspunktet sett av 120.000 kroner til 28 nye maskiner, men prislappen kjem på rundt 150.000 kroner.

Derfor blir ikkje dei 2 år gamle pc-ane kasserte, dei skal seljast for 1000 kroner stykket.

- Dette er bærbare IBM pc-ar med stort minne og svært stabil og rask prosessor, maskiner som hadde kosta rundt 20.000 kroner å kjøpa ny, seier Soltvedt.

Maskinene er klare for levering onsdag i neste veke, men frå i dag startar salet.

- Folk kan koma innom eller senda epost for å bestilla, her blir det førstemann til mølla, seier Soltvedt.

Ville ha Terje si maskin

Allereie førre veke hadde enkelte lokalpolitikarar fått med seg at det var pc-sal på gang, og nokre av dei var ivrige etter ei spesiell maskin.

- Det var ein i opposisjonen, eg vil ikkje nemna namn, men han har vore rådmann i Os tidlegare, som spurte spesielt etter Søviknes si maskin. Kanskje han tenkte at det var noko «snop» å finna på maskina.

- Men eg kan forsikra alle om at maskinene er tømt for alle data og spor før dei blir leverte til kjøparane.