Må gje vekk 40 nye syklar

Oppdatert: Denne saka var, som mange forsto, ein aprilspøk. Midtsiden har sans for spøkar som får folk til å flytta på seg, noko vi har klart fleire gongar, men eit streif forbi lageret i 12-tida fredag viste ikkje teikn til at nokon beit på i år. Vi har òg sans for diskrét kommentering av aprilspøker i sosiale media, kommentarer med ei form som opnar for at andre kan lata seg lura, samtidig som du, mellom linjene, viser at du tok han. Om du har behov for det.

MX Sport Bergen Holding og Sport Outlet blir saman med Elements Production første leigetakar i gigantlageret i Ådnadalen.

Elements Production er produksjons- og importfirma som MX-gutane eig, men no har dei for første gong vore uheldig med eit vareparti.

– Syklane kom torsdag, i to ulike variantar, begge med alvorlege, men morosame misdanningar, seier medeigar Jan Frode Skeie.

20 av syklane har framhjulstrekk, dei 20 andre har kryssa kjede, noko som betyr at du må trø bakover for å sykla framover.

– Det hele kjem frå ein test av eit nytt girsystem. Dessverre har fabrikken i Kina misforstått på to ulike måtar.

Skeie slepp å betala kinesarane. Men kva med syklane?

– Det som er morosamt, og som gjer at vi ikkje vil kasta syklane, er at det faktisk går an å sykla på dei. Bror min, Tor-André, har faktisk blitt så driven at eg vil nesten seia at han trør betre baklengs enn framlengs, humrar storebror Skeie.

Partnar Odd Arne Larsen, som prøver å sjå butikk i alt, lanserte ein idé om å arrangera Fanafjellet Opp på desse syklane. Men forslaget blei heldigvis klubba ned.

– Syklane blei levert i ein stor kontainer direkte på det komande nye hovudlageret.

– Klokka 12 i dag opnar eg kontaineren og dei som vil ha seg ein sykkel utanom det vanlege kan berre møta opp i Ådnadalen. Her blir det førstemann til mølla, om nokon i det heile tatt trur at dette kan bli morosamt.