Lysthuset flyttar til Osøyro neste år
Monika Nord har sikra seg leigekontrakt på bakkeplan.
I august blei det kjent at dei eigarane av Drageset-bygget i Os sentrum har fått leigetakar på det siste ledige lokalet, mellom Tiny Trolls og Osøyro Kolonial.
No er det klart kven leigetakar er.
Monika Nord fortel at ho i 2021 flyttar til Os sentrum med butikken sin, Lysthuset, ein mote- og interiørbutikk som fyller 15 år neste år.
– Vi driv vidare her på Amfisenteret fram til opning på Osøyro, som truleg blir til sommaren neste år, seier Monika.
15 gode år på AMFI Os
Monika dreiv nettbutikk i 4-5 år før ho i 2006 opna butikk på senteret. Ho var med andre ord tidleg ute med nettsatsing, og har framleis nytte av digitale verktøy.
– Eg har fire tilsette, éi som driv nettbutikken og tre som er ekstrahjelp i butikken. Instagram er òg ein god kanal for oss, ved sidan av sending av varer har vi kundar som køyrer frå blant anna Knarvik og Sotra for å handla her, saman med lokale kundar og ein god del hyttefolk om sommaren.
Handplukka utval innan interiør og mote
Lysthuset opna som ein interiørbutikk, i hovudsak med småvarer, men så blei utvalet supplert med sko og klede. Støvlar og Uggs var bestseljar lenge, og er framleis i utvalet.
– Norsk og nordisk design og produksjon har vore prioritert, men utvalet spenn frå norsk, svensk og dansk til spansk og australsk.
– Kva aldersgruppe har du sikta deg inn på?
– Der òg har spennet blitt stort, ikkje minst etter at vi ganske nyleg fekk inn merket Juicy Couture. Då auka brått mengda tenåringar i butikken, og no har vi nok kundar i alder frå 12 til 80 år.
Draumen om «fortausbutikk»
Bedrifta har fleire år vore blant dei som prosentvis har vakse mest av leigetakarane på senteret, noko som blant anna har ført til fleire gasellekåringar i Dagens Næringsliv.
Monika seier at flytting frå AMFI til Os sentrum ikkje berre handlar om å redusera utgiftene.
– Å driva butikk på gateplan i sentrum har lenge vore ein draum, og då dette lokalet dukka opp blei eg raskt interessert. Eg har vore i dialog med huseigar i nesten to år før tida no var moden.
– Samtidig vil det å vera frittståande gi meg ein annan fridom, både når det kjem til opningstider og kampanjar. No håper eg å få ei fin avrunding på femten fine år på senteret, fram mot sommaren, og så er eg spent på nytt lokale og det å driva på Osøyro, seier Monika Nord.
