Lyssand og Skogedal er Extra klare
To lokale kjøpmenn skal styra nye Coop Extra. Låge prisar, stort utval, fersk fisk og søndagshandel er blant satsingsområda.
Bildeserie:
Torsdag 27. oktober skal butikken opna, 2617 kvadratmeter i tilbygg på AMFI Os, med salsflate på 1557 kvadratmeter og med sjef og nestsjef frå Os.
– Det var viktig for oss å få osingar i leiinga. At vi skulle vera så heldige å få to osingar, begge med lang fartstid trass i ganske ung alder, var ein bonus, seier driftsleiar for Coop Extra i Hordaland, Gjertrud Botnen Aalmo.
Fekk med seg Øyvind
Kenneth Lyssand starta i daglegvarebransjen hos Drageset som 12-åring. 20 år gamal var han butikksjef på Haugsneset. Assisterand butikksjef Øyvind Skogedal har vore i bransjen sidan han var 16 år, nestsjef under Kenneth på Haugsneset og sjef eit år på Eurospar på AMFI Os.
– Eg nølte ikkje då eg fekk tilbod om jobben og ba samstundes om å få med meg Øyvind. Vi jobbar godt saman, seier Lyssand.
Begge har dei siste åra jobba for Ringnes, men ser veldig fram til comeback i daglegvarebransjen i ny, stor Coop Extra, den 7. Coop Extra-butikken i Hordaland.
Nonfood og fersk fisk
Coop Extra er som ein komprimert OBS!, med stor nonfoodavdeling med alt frå verktøy og leikar til strikkegarn og kjøkkenutstyr.
– Vi ventar at nonfoddavdelinga skal utgjera rundt 7 prosent av omsetnaden, seier Lyssand.
Men mat er viktigast for butikken. Frukt, grønt, bakervarer og fisk, ikkje minst.
– Vi får nokre varme kjøttrettar i skap medan det blir satsa endå meir på fisk. Vi får eigen betjent fiskedisk med fersk fisk inn dørene kvar dag.
Søndagsopen avdeling
Den 2600 kvadratmeter store butikken skal ha 5 kassar, 2 av dei blir kasse kun for kortbruk.
I tillegg er det sett av ein butikk i butikken, ei avdeling med eigen inngang, ein butikk som skal ha søndagsope. Denne får to kassar og passeleg mange kvadratmeter.
200 søkte om jobb
I tillegg til Lyssand og Skogedal kjem du nok til å treffa fleire osingar i butikken, som har fått 30 tilsette.
– Over 200 søkte om jobb. Det var overveldande! Det er ikkje kjekt å seia nei til så mange, men veldig gøy at så mange vil jobba hos oss, synes Kenneth.
No er fleire hyller, kjøl og frys på plass i butikken. Fleire varer har også kome.
– Tørrvarene kom i går og i dag, i neste veke skal dei i hyllene.
Ventar medlems-boom
Coop har vore i AMFI Os lenge, men Botnen Aalmo legg ikkje skjul på at Coop Prix var ein liten veslebror til den andre daglevarebutikken i senteret.
– Likevel har vi mange medlemmar i Os, truleg er mange av dei gode kundar hos OBS! på Lagunen. Med dei medlemsfordelane vi har, som startar med medlemskveld i butikken dagen før opning, altså onsdag 26. oktober, trur vi medlemstalet kjem til å veksa kraftig i tida som kjem.
Coop er som kjent eigd av medlemmane og medlemmane får, i tillegg til del av utbyte, rabattar på blant anna bensin, telefonbruk, varer hos Kapp Ahl og eigne tilbod frå Coop.
– Reisekupp er populær medlemsfordel, i tillegg til eigne tilbod og rabattar i våre eigne butikkar. Og dei som vil koma kvelden før opninga må vera raske med å registrera seg som medlem, gjerne på nett, seier Botnen Aalmo.