Luranetunet vann møblar for 55.000 kroner

Bohus køyrer denne jula, som mange andre, ein adventskalender på sosiale media. Dei skil seg ut med ekstra store premiar.

Publikum kan ved hjelp av hjarte- og likar-teikn stemma på kven dei meiner fortener å vinna ei stor julegåve frå møbelkjeda.

Kvar sundag gjennom adventstida kårar Bohus ein vinnar, og finalistane har blitt vald via nominasjonar frå Bohus sine kundar.

Stavanger versus Bjørnafjorden

Til den andre sundagen i advent kunne publikum velja mellom Sunde sykehjem i Stavanger og Luranetunet bu- og behandlingssenter.

Søndag vart det klart at Luranetunet hadde sikra seg ei ekstra stor julegåve.

Driftssjef i Bohus, Harry Skage, gler seg over gåva som no skal til Lurantunet.

– Julegåva består av to komfortable sofaer, to gode lenestolar, eit sofabord, pynteputer, pledd og ein gulvlampe, alt til ein verdi av 55 500 kroner!

– For oss i Bohus er dette ein kjekk måte å vera til nytte, tilstades og synleg i samfunnet.

Monterer ferdig og køyrer ut

Skage fortel vidare at når møblane kjem frå lager i Oslo, vil dei grunna korona-situasjonen, først bli monterte på Bohus i Kolskogen, før dei går vidare på bil til Lurantunet.

– Vi skal sjølvsagt montera og klargjera den flotte premien, men grunna situasjonen er det ikkje eit alternativ å ta sjølve monteringa på Luranetunet. Vi gler oss allereie til jobben, seier driftssjefen.

Gler seg over premien - takkar for engasjementet og framsnakkinga

Nytilsett einingsleiar ved Luranetunet bu- og behandlingssenter, Åslaug Brænde, gler seg over julegåva som no kjem.

– Eg fekk veta om dette måndag morgon, og eg må seia eg er overvelda over responsen vår nominasjon fekk. Når eg les i kommentarfelta på Facebook-sidene til Bohus, er det ikkje berre det at vi fekk flest stemmer som gler meg, men òg kva folk skriv om Lurantunet, og kvifor dei meiner vi burde vinna.

Brænde fortel at både tilsette og bjørnafjordingar elles har framsnakka Lurantunet i kommentarfeltet på ein måte som overraskar ho.

– Eg vart rett og slett rørt over korleis folk famnar om Luranetunet. Eg har allereie sendt ut ein epost til alle tilsette og takka dei for støtta, men her og no må eg òg få takka alle dei andre som har stemt på oss.

Brænde fortel at det ikkje enno er avklart kor premien skal plasserast i bygget.

– Det kom litt brått på dette, men vi har nok av plass, så eg ser fram til at både bebuarar og dei tilsette skal få ta i bruk denne flotte gåva frå Bohus.