Lucia-glede for små og store
Bildeserie: Full uttelling for ungane i Kuventræ barnehage då dei feira lucia på Os VGS.
Bildeserie:
Førskulebarna, med støtte for nokre fireåringar, skapte skikkeleg julestemning på Os VGS onsdag.
– Vi er jo nabo til skulen, så difor inviterte oss sjølv for å feira Lucia saman med elevane i kantina. Det er første gangen vi gjer dette og i dag var vi ekstra heldige siden pensjonistane som har jobba på skulen tidlegare var samla til julelunsj, fortel Karianne Moberg, styrar i Espira Kuventræ barnehage.
Dei flinke smårollingane varta opp med den tradisjonelle Luciasangen og den meir moderne versjonen Santa Lucia frå Jul i Svingen. Til glede for både pensjonistar og elevar frå helse- og sosial-linene ved Os vidaregåande skule.
Inviterte til juleverkstad
Elevane ved VG2 barne- og ungdomsarbeider returnerte julegleda med å invitera ungane frå Kuventræ barnehage til juleverkstad i klasserommet.
– Vi ville jo berre synga, men det var eit kjempeflott initiativ frå yrkesskulen å invitere oss til juleverkstad. Det er jo også ein god erfaring for elevane å ta med seg, smilte Moberg på veg opp i klasserommet.
Nokre av elevane kjente ungane godt frå før, då dei har vore utplassert i barnehagen på arbeidspraksis.
Faglærar Inger Lise Bråten fortalde at elevane hadde førebudd seg med fire ulike arbeidsstasjonar og i tillegg hadde bakt peparkaker, lussekatter og laga saft som ungane skulle få etter endt arbeidsstove.