Lothepus svingte seg med publikum
4. julifeiringa på Er-An Veikro førte til salsrekord på øl. Festen blir del av Fjorden Cowboys sesong 4.
Bildeserie:
Laurdag var det storstilt feiring av den amerikanske uavhengighetsdagen - også i Os. Er-An Veikro hadde i samarbeid med Os Amcar Club konvoi med amcars frå Røykenes til Hegglandsdalen tur-retur før show med konsert i telt ved restauranten.
Sjå video og bildeserie: På cruising med Haugland og Thuen
På kveldstid var det utselt konsert med Lothepus, Mighty Magnolias og Blue Note Shuffle.
– Kjem gjerne tilbake
Leif Einar «Lothepus» Lothe er glad i å gå med cowboyhatt, men var ikkje førebudd på all 4. juli-staffasjen.
– Eg fekk først veta det i dag. Men det var veldig kjekt, både plassen og publikum, eg liker osingane godt, seier Lothepus til Midtsiden backstage etter konserten.
Han er også veldig nøgd med gjesteartisten han hadde med seg, Sarah Johnson, som speler ni instrument og tok mastergrad i fløyte som 21-åring.
Lothepus-manager Ola Melkeraaen fortel at Sarah turnerer internasjonalt, men at ho nok blir å sjå saman med Lothepus fleire gongar.
TV-innspeling
Lothepus blei verande i partyteltet til langt over midnatt, der han signerte autografar, tok seg ein dans og prata med gjestane.
– Flimmer Film var med og gjorde opptak. Til hausten startar sesong 3 av Fjorden Cowboys, opptaket var til sesong 4, som skal sendast til våren igjen.
– Eg veit ikkje kor mykje av kvelden som blir vist, men at det kjem noko frå Søfteland er heilt sikkert, seier Melkeraaen.
Full klaff for lokale band
Etter Lothepus var det Mighty Magnolias sin tur. Dei fekk fantastisk mottaking av publikum og blei bedt om så mange ekstranummer at dei spelte i nesten 1,5 time i strekk.
Så var det Blue Note Shuffle sin tur.
– Eg har stort sett vore frilans det siste året, og det var veldig kjekt å spela med bandet igjen. Spesielt livleg blei det med eit sånt publikum, for oss som speler blues og rock er det jo ekstra gøy når folk går med cowboyhatt og dansar på bordene, seier vokalist og gitarist Steinar Lyssand.
Blue Note Shuffle skal på scenen saman igjen fredag 21. august, når Bergen Bluesklubb skal opna igjen, då med konsert på Bar Barista i Bergen.
- Blir ein tradisjon
Linda Andersen er heilt matt etter den travle helga.
– Eg er både glad for at alt gjekk så fint. Med unntak av litt teknisk svikt med ein kasse midt på dagen, gjekk alt på skjener, seier Linda.
Ho har aldri selt så mykje øl og cider blei det tomt for.
– Vi er utruleg takksame både for alle frivillige som stilte opp og gjorde paraden mogleg, og for alle dei fine tilbakemeldingane.
– Dette blir tradisjon, der er garantert! Men neste år skal eg kjøra min eigen amcar i paraden.
– Har du amcar?
– Nei, men det ordnar seg før fjerde juli neste år. Eg skal finna meg ein rosa Cadillac, og eg skal kjøra rett bak den store trucken i front av paraden, seier Linda og ler.