Livet etter Lyssand

For eit år sidan blei det kjent at Inwido ønska å flytta Lyssand-produksjonen frå Os. Ei Os-bedrift som blei kraftig råka av dette var Os Asvo, som hadde 70 prosent av omsetnaden sin frå Inwido.

– Det er veldig utfordande uten Lyssand, det krev meir av oss, fortel Nygaard, som er dagleg leiar i Os Asvo.

– Samtidig gjev det oss ein kjempespennande kvardag, der vi må ut å få nye kundar og vera meir aktiv i marknaden.

Nygaard fortel at dei framleis har Inwido som god kunde, men i mykje mindre skala enn før.

Nye kundar dei har fått på lista er blant anna Hole Glass, Norden Maritin og Os Maskinering.

– Eg må skryta av næringslivet i Os, og eg håper på eit vidare utvida samarbeid med lokale bedrifter.

Byggjer klatrepark

Ein av dei store nye kundane til Os Asvo er Høyt og Lavt, som byggjer klatreparkar.

– Plattforma er den delen ein står på oppe i høgda, og vi har fått kontrakt på å laga alle plattformene til klatreparkane dei skal bygga i Noreg.

Nygaard fortel blant anna om ein klatrepark som skal byggjast på Kyrkjebyrkjeland, rett ved Osvegen.

– Trur folk kjenner betre til oss no

Os Asvo har mange ulike oppdrag, både for bedrifter, men også frå private.

– Vi er ein underleverandør til industrien, men vi får også førespurnadar frå private om å laga blant anna benkar, kommodar og kjøl.

Os Asvo er òg blitt ganske ettertrakta til å ta overflatebehandling på for eksempel kjøkkeninnreiing.

I 2014 starta dei også som matleverandør med lunsjutkjøring.

– Vi lagar lunsj til kantina på rådhuset og kjører ned til Midttun for å levera til ei felles kantine for fleire bedriftar.

– Eg trur folk er meir kjent med oss no og dei blir overraska over alt det vi gjer.

– Godt at det gjekk fort

Nygaard fortel at ved å ha fleire mindre kundar så spreier dei risikoen meir enn då dei hadde éin stor kunde.

– Eg synest det var godt at det skjedde så raskt i staden for å trappa gravis ned, då måtte vi berre hiva oss rundt og få tak i nye kundar med ein gong.

Sjølv om 2014 gjekk betre enn venta så er Nygaard spent på året vi no har starta på.

– Den store baugen får vi i år, då får vi sjå kor mykje dei andre kompenserer for Lyssand, det blir spennande.

Nytt bygg i 2016

Os Asvo AS har i dag totalt rundt 60 tilsette. Blant dei er det skuleelevar, psykiatri, VTA (varig tilrettelagt arbeid) og APS (arbeidspraksis i skjerma verksemd), i tillegg til arbeidsleiinga på 13 personar.

Sidan 1997 har Os Asvo heldt til i lokaler i Os Næringspark, men i nær framtid flyttar dei til nye lokaler.

– No går vi i gang med anbodsrunde på nytt bygg i Kolskogen, fortel Nygaard.

I samarbeid med kommunen, som skal leiga 50 prosent av bygget, satsar dei på å ha bygget klart i løpet av 2016.

– Det skal bli veldig kjekt å bli med å forma bygget frå botnen av og få det akkurat slik vi vil, seier Nygaard.

For 2015 ser Nygaard at dei går ei utfordrande tid i møte produksjonsmessig, men synest samtidig at at dei har kome godt i gang.

– Ein del omstillingar gjev oss gode sjansar med nye kundar og nye oppdrag.