Liv skapte stålkontroll

– Det har verkeleg sett Os kommune på kartet, seier kommunalsjef Nils-Petter Borge.

1. mai 2016 starta forsøksprosjektet med statleg finansiering av omsorgstenestene (SIO-prosjektet) i Os kommune.

– No har vi vore i drift eitt år. Vi har drifta alle prosjekta med ressursar internt i tenesta. Vi har ein organisasjon som er veldig innovativ og som ønskjer å bidra, fortalde prosjektleiar Barbra Træland, som saman med leiar for bestillar- og forvaltarkontoret, Birgit Holsen, gav tenesteutvalet ei statusoppdatering onsdag førre veke.

Krevjande, men lærerikt

Ei av dei som verkeleg har fått køyrd seg det siste året er økonomirådgjevar Liv Eriksen Villeneuve. Då prosjektet starta blei nemleg pengane til omsorgstenestene trekte ut av samlepotten kommunen får frå staten til drifting av alle tenestene.

I stadet får kommunen no eit rundsumtilskot for å dekkje administrasjonskostnader og lågterskeltilbod, eit vedtakstilskot som følgjer pasienten og eit inntektspåslag på 4 % av netto driftsutgifter.

– Økonomi har vore veldig krevjande, men også veldig lærerikt. No får vi pengar minutt for minutt, fortalde Eriksen Villeneuve i møtet.

70 kodar og 5700 linjer

For å få utbetalt midlane frå staten må kommunen rapportera på nye vedtak, midlertidig opphøyrde vedtak og avslutta vedtak.

– Vi trudde det var enkle ting, men det viste seg at det var krevande arbeid. Vi har måtte oppdatere pasientsystema med 70 ulike tenestekoder, som er veldig detaljerte, for å kunna rapportera på det vi leverer.

– Det siste korreksjonsoppgjeret som vi leverte per 31. desember var på 5700 linjer, eller vedtak, om du vil.

Har stålkontroll

Arbeidet har gjort at kommunen no har full kontroll på kor mykje ressursar dei nyttar på kva oppgåver.

– No kan vi få til ganske mykje gøy. No har vi eit verktøy som viser kva vi leverer, kor mange årsverk vi har. Vi kan sjå om vi klarer å levere det vi skal, om vi har for mange på jobb eller for få på jobb. Dette må vi vidareføre også etter SIO, sa Træland.

– Det verktøyet Liv har utarbeidd er eit verktøy omsorgssektoren treng, no har vi endeleg fått det på plass. Det hadde vi ikkje fått til utan SIO. Ho har òg hjelpt dei andre kommunane med excel-arket. Rapporten er eit framtidig verktøy for budsjettering i pleie- og omsorg. Det er revolusjonerande.

Kommunalsjef Nils-Petter Borge var tydeleg nøgd med medarbeidarane.

– Eg er stolt av alle medarbeidarane våre som jobbar i sektoren. Det å jobba så tett på helsedirektoratet har òg ein verdi i seg sjølv. Den jobben Liv, Barbro og dei andre på bestillar- og forvaltningskontoret har gjort har verkeleg sett Os kommune på kartet.