Lindborg signerte stort ordføraropprop til Google

Denne veka melde Nynorsk kultursentrum at 108 ordførarar i fylke og kommune har skrive brev til Google kor dei krev nynorskversjonar av program som blir mykje brukt i skulen.

På Nynorsk kultursentrum sine nettsider, nynorsk.no, kjem det fram at initiativet til brevet er teke av mållaga i Ørsta, Volda, Stranda og Ulstein.

Misnøya med Google skal grunna i at dei, som éin av to store aktørar for digital infrastruktur i grunnskulen og vidaregåande opplæring, ikkje tilbyr nynorskvariantar av program som G Suite for utdanning, Google Chromebook, Google Classroom og nynorsk rettskrivingsprogram.

– Heilt naturleg for meg å signera

Ordførar i Bjørnafjorden kommune, Trine Lindborg (Ap), er ein av dei 108 ordførarane som har signert brevet til Google.

– Då eg fekk høyra om dette initiativet, fann eg det heilt naturleg å signera som ordførar her i Bjørnafjorden, fortel Lindborg.

– Eg tenkjer det det er viktig å halda fokus på nettopp denne saka. Ikkje berre er nynorsk administrasjonsspråket i kommunen, vi er trass alt den største kommunen i landet når det kjem til nynorskelevar i skulen.

– At vi i budsjetthandsaminga ikkje fekk gjennomslag for nynorsk for flyktningar i vaksenopplæringa, blei sjølvsagt ein strek i rekninga i denne runden, legg Lindborg til.

Glad i nynorsken - køyrer dialekt

På spørsmål om kva nynorsken betyr for Lindborg sjølv, seier ho at ho ikkje er å rekna som ein fanatikar, men at for henne er det naturleg å bruka nynorsk, då gjerne i kombinasjon med dialekt.

– Eg brukar nynorsken så godt eg kan kvar dag. Då eg byrja som folkevald skreiv eg alle innlegga mine på dialekt. På denne måten kjende eg att meg sjølv i teksten når eg las den.

– Det blir jo av og til litt samanblanding av desse to, men for meg er det viktig å halda på dialekta mi. Samstundes gler eg meg stort over lyrikk på nynorsk. Det er lite som beveger meg så mykje som den rikdomen det nynorske språket sit på.

Vil Google lytta?

– Men trur du store Google vil lytta til dette oppropet, Lindborg?

– Eg håpar verkeleg at dei gjer det når dei får eit såpass stort og tydeleg signal. Eg vel å tru at dei rett og slett berre ikkje heilt har tenkt seg godt nok om i arbeidet med desse tenestene.

– Born og unge byrjar tidlegare og tidlegare å nytta Google sine tenester. Då er det viktig at dei, i skulealder, blir møtte med program og tenester som faktisk kjenner att dei orda dei elles nyttar i skulekvardagen.