Likevel ikkje generalsekretær

Avtroppa skulesjef i Os, Ingvar Torsvik, fekk i sommar ny jobb.

I ei pressemelding frå Nordmisjon sendt onsdag ettermiddag, kjem det fram at Torsvik likevel ikkje tiltrer i stillinga som generalsekretær for organisasjonen.

– Landsstyret i Normisjon har dei siste vekene gjennom dialog og avklaringssamtalar med Ingvar Torsvik trekt den konklusjon at forutsetningane for tiltreding i stillinga som generalsekretær ikkje lenger er til stades, skriv landsstyret sin leiar, Tormod Kleiven, i pressemeldinga.

Landsstyret presiserar at avgjersla ikkje blir begrunna i spørsmål innan samlivsetikk eller andre læremessige spørsmål. Torsvik har, ifølgje pressemeldinga, gjeve si tilslutning til det som Normisjon står for på desse områda og til Normisjon sitt verdidokument i sin heilskap.

– Landsstyret beklagar sterkt situasjonen og den belastninga som dette har medført for Torsvik og for organisasjonen. Ein vil i det følgjande sørge for ein grundig evaluering av ansettelsesprossessen, skriv Kleiven.

Takling i garderoben

Vårt Land gjengir ein e-post Torsvik har sendt tilsette i Normisjon og sentralstyret kor Torsvik beskriv korleis han opplever situasjonen.

– Tenk deg, at du sit i garderoben blant nye lagkameratar og gjer deg klar til kamp. Nett i det du er i ferd med å trekkje drakta over hovudet, slik at ein er blind for det som skjer eit lite augeblikk, får du ei takling som er så stygg at den hadde kvalifisert til direkte utvisning om kampen hadde vore i gang.

– Når eg spør, kva skjer? og kvifor?, får eg berre melding frå eit styre som nektar å snakke med meg; "Fordi du ikkje skal spele".

– Og forklaring på at taklinga måtte koma i garderoben, var nettopp dette at før kampen er du ikkje beskytta av spelet sine reglar og dei som utførde taklinga slepp å bere konsekvensane, skriv Torsvik i e-posten.

– Uverkeleg

Torsvik skildrar eit godt møte med Normisjonen på lokalt og regionalt nivå, men at det heile snudde etter eit intervju i Dagen.

– Med avisa Dagen 31/10-2013 kom natta, ein sval haust blei med eit til ein iskald vinter, og permafrosten som no følgde lamma all kommunikasjon og alle prosessar i fortsettinga.

– Varmen, lysten og engasjementet har blitt styrka i møte med tillitsvalgde og tilsette. Deira iver og uthaldenheit har bore meg fram til i dag. Men nett no oppleves det heilt uverkeleg at eg frå 1/1 2014 er arbeidsledig, avsluttar Torsvik e-posten.