– Lenge sidan sølv har smakt så bra

– Ein kjempeopptur, sa osingane som hadde reist til Hamar for å sjå Sverre og Håvard kjempa om medalje i allround- og sprint-VM på skøyter.

Lorentzen landa på 5. plass i sprint, Lunde Pedersen låg på 2. plass samanlagt etter to av fire løp.

Etter 5. plass på 500 meter og 2. plass på 5.000 meter laurdag, følgde Sverre opp med nok ein 2. plass på 1.500 meter søndag.

Då var spørsmålet, ville han fullføra 10.000 meter, sin første sidan persen under allround-VM i Calgary i fjor, med stil på tampen av ein sesong prega av sykkelvelt i oppkøyringa?

Kjempa knallhardt for VM-sølv

Sverre kom på 7. plass av 8 deltakarar på 10.000 meter, men tida var med svært knapp margin god nok til å slå Seitaro Ichinohe frå Japan samanlagt.

– Tida etter VM i USA har vore tung, og eg har trengt meir kvile enn planlagt. Men inn mot VM kjente eg meg i stadig betre form, og eg hadde faktisk ikkje trudd at eg skulle bli sliten så tidleg som eg gjorde på 10.000-meteren, seier Sverre til Midtsiden.

Det var venta at Ichinohe skulle gå bra på dei første tre distansane, men Sverre er imponert over 10.000-meteren hans, som var japanaren si bestenotering.

Patrick Roest vann VM-gullet Sverre har jakta på i fleire år. Men det fjerde sølvet i allround-VM smakte godt for osingen.

– Det blei ein lang, mental kamp, ei tøff reise på tampen av ei fysisk og psykisk krevjande helg.

Takkar for god støtte

Sverre takkar det enorme heimepublikummet for drahjelpa, både under 10.000 meter søndag og dei tidlegare løpa.

– Dei hjelpte meg i sluttfasen på alle løpa, det var ein enorm energi i Vikingskipet i helga.

– Vi har jo ein og annan sambygding med utestemme, høyrer du enkeltpersonar òg mens du går?

– Ha, ha! Nei det er så høgt lydnivå i hallen at det gjer eg nok ikkje. Men det er kjekt å sjå dei på tribunen, og å veta at dei er der.

I fjor vann Sverre gull i VM på 5000 meter enkeltdistansar, men svikta i dei to siste rundane på same distanse i allround-VM, landa på 3. plass på distansen og måtte nøya seg med sølv samanlagt, bak Patrick Roest, framfor Sven Kramer.

I 2018 ramla han frå VM-gullet, men reiste seg og tok sølv.

I går tok han eit sølv som smakte betre.

– I fjor hadde eg betre løp og var nærmare gullet. Slik årets sesong har vore kjennest det verkeleg ut som om eg i år har vunne sølvmedalje.

– Sist det smakte like godt med sølv var nok då eg tok sølv bak Kramer i 2016.

Kvile og flytting

Sverre har stått over fleire verdscuprundar, og er ikkje kvalifisert til verdscupavsluttinga i Heerenveen til helga. VM var dermed sesongavsluttinga for verdsstjerna frå Os.

– Kva skal du gjera dei neste vekene?

– Minst mogleg. Vi skal flytta frå leilegheit på Apeltun til einebustad på Sandsli, så tida går med til kvile og pakking.