Legg opp til lang snorklipping og kort tog
Mange lys skal tennast fredag morgon og fredag kveld.
I førre veke blei dei første nye lenkene i spleiselaget sin nye pakke med jul- og vinterbelysning montert og tent.
Samtidig blei lokalet peparkakebygda skal vera i denne jula kontrollert og «ausa» etter lekkasje i bygget.
I går var Helge Bøe og leverte gran til juletreskogen.
Fredag morgon i 08.30-tida skal Os Kulturutvikling sine lys på Borgafjellet tennast - av elevar på Borgafjellet barneskule - fredag kveld blir det tenning av julegrana i Os sentrum.
– Det blir eit tog inn til Torget i år òg, men eit kortare tog, frå Esso i staden for Hamnevegen, fortel Christoffer Kobbeltvedt frå Fjordfolk.
Bildeserie:
Fjordfolk styrer arrangementet for Os Sentrumsforening, og samarbeider med kultureininga i kommunen om dekorasjonen og opninga.
Også investeringa i nye lys er eit smarbeid. Kommunen og fleire bedrifter, ikkje minst Sparebanken Vest og Fana Sparebank, har spleisa på ein lyspakke til over 600.000 kroner.
– Vi har invitert alle dei over 30 som bidrog i spleiselaget til å vera med og klippa snora ved Esso. Så blir det marsj inn Torggata, utan faklar, så vi håper folk tar med hodelykt, lommelykt eller lyser med mobiltelefonen, så vi får lys og stemning i toget.
Folk blir oppmoda å stilla med munnbind eller halda over ein meter avstand til nestemann.
Programmet er enkelt:
- Oppmøte på Eso seinast 17.45. Tale ved Paal Moberg, styreleiar i Os Sentrumsforening, snorklipping og marsj.
- Julegrana blir tent klokka 18. Os Musikkforening speler, nissen kjem og deler ut snop til dei yngste.
- Samtidig blir peparkakebygda avduka. Du kan ikkje gå inn i lokalet, men sjå utstillinga gjennom fasadevindauget.
- Etterpå blir lysa tente i julekrybba i Tunet og i juletreskogen på Kyrkjeflaten.
- Folk blir oppmoda å spreia seg litt i sentrum etter marsj og julegrantenning.
