Lar borna leike med lyd
Laurdag kjem musikarar frå BiT20 Ensemble til Oseana for å leika med borna i «Lydgrotten».
«Lydgrotten» er ei framsyning der musikarane frå BiT20 Ensemblet involverar borna til å delta i framsyninga.
– Vi har med oss fire flotte formidlarar som inviterar med seg borna til å skapa musikk. Dei har laga eit musikkstykke, men treng hjelp til å laga det ferdig, forklarar Trude Bruket, dagleg leiar for BiT20 Ensemblet.
For fulle hus
Framsyninga gjekk denne helga for fulle hus i Barnas kulturhus i Bergen.
– Konseptet er tilpassa born i alderen 3 til 8 år. Eg vil oppmoda alle om å ta med seg sine eigne lydar til forestillinga. Om du tenkjer deg om er det mykje av det du har heime som lagar lyd på ulikt vis. Borna har truleg allereie utforska det, seier Bruket.
– Desse kvardagslydane kan vi setje saman til å passa inn i musikken i Lydgrotta. Vi tek ungane sin nysgjerrighet og utforskingstrang på alvor og involverar dei til å delta saman med våre proffe musikarar, avsluttar Bruket.