– Langdryg og villeiande behandling

Dei venta at oppstartløyvet skulle bli godkjent, i staden var det ein halvanna år gamal dispensasjonssøknad plan- og bygningsutvalet behandla, og sa nei til, i førre møte. Dette var ein søknad Borgafjell Barnehage i juni i fjor skal ha fått beskjed om at dei ikkje trengte å få godkjent.

– Vi lurer på kva som skjer på innsida av rådhuset i Os, korleis denne kommunen blir styrt, seier Annelie Osterdahl.

Borgafjell Barnehage har bestilt materialpakke og oppføring og tilsette er på plass. Planen var å få barnehagen ferdig før 15. september i år. Derfor skulle den også vera med på hovudinntaket i februar. Det blei den ikkje. No er det uvisst kva som skjer vidare.

– Saka ber preg av villeiing og langdryg behandling, seier Borgafjell Barnehage sin advokat, Jarle Ringheim frå Kluge Advokatfirma.

Ulovleg argument

Saka om ny barnehage ved Hegglandsdalsvegen, på nedsida av bustadområdet på Hjelle, starta i 2008. Dette var før Espira bygde sine to i Kolskogen og Os kommune sin nye barnehage i Gymnasvegen effektivt blei planlagt og bygd.

Kommunen seier gang- og sykkelveg frå Hauge til Vallabrua må på plass før dei kan gje oppstartløyve. Osterdahl seier selskapet hennar, i møte mellom utbyggar Trond Eriksen hos Malthus og avdelingsleiar Geir Heldal i Os kommune, i juni i fjor, fekk beskjed om at dei kunne sjå vekk frå dette rekkefølgjekravet i reguleringsplanen.

"Rekkefølgebestemmelsene blir ikkje gjort gjeldande fordi reguleringsplanen ikkje gjeld, sidan den ikkje er endeleg godkjent av fylkesmannen, og rammeløyve allereie er gjeve", skal Heldal ha sagt.

– Då eg onsdagen las på Midtsiden at kommunalsjef for oppvekst og kultur, Ingvar Torsvik, ikkje vil at barnehagen vår skal realiserast i år fordi det er overkapasitet i Os, og plan- og bygningsutvalet dagen etter samrøystes seier nei til ein nesten 1,5 år gamal dispensasjonssøknad vi i mellomtida har fått beskjed om at vi ikkje treng - då er det noko som skurrar.

Då staten i 2011 la om finansieringa av dei private barnehageplassane tilpassa barnehagane seg, noko som førte til eit overforbruk på kommunen sitt budsjett med 23,7 millionar kroner.
Om det kjem fleire private barnehagar vil det bli tatt inn fleire yngre ungar, konkurransen blir større og summen Os kommune bruker på subsidiering av plassar blir endå høgare.

– Problemet for kommunen er at dette ikkje er eit lovleg motargument for nyetablering, og det veit dei nok på rådhuset.

– For det første gav han sjølv grønt lys til oss i februar i fjor, for det andre kan ikkje kommunen bruka dobbeltrolla si på denne måten. Vi fryktar at dei derfor bruker andre midlar, som å seia nei til ein dispensasjonssøknad dei først sa vi ikkje trengte å ha innvilga, seier Osterdahl.

Kjenner seg ikkje igjen

Leiar for plan- og bygningsutvalet i Os, Ståle Skaatun (H), seier han ikkje har høyrt noko om at barnehagen har fått dispensasjon frå søknaden om dispensasjon.

– Vi behandla denne saka som andre saker. Eg er i utgangspunktet positiv, men utbygging må skje i rett rekkefølgje og i dette området er det krav om at gang- og sykkelveg skal på plass først, så det blei samrøystes gått inn for administrasjonen sitt framlegg til vedtak, seier Skaatun.

Geir Heldal, leiar for bygge- og forvaltningssaker i Os kommune, seier han ikkje kjenner igjen det Osterdahl refererer til, om at han har sagt i møtet i juni at kravet kan sjåast vekk ifrå.

– Eg kan ikkje overstyra ein reguleringsplan og seia at folk kan sjå vekk frå punkt som for eksempel rekkefølgjekrav. Eg kan ikkje forstå kvar dei har dette frå, noko sånt har eg aldri sagt og kjem aldri til å seia, folk må halda seg til vedtektene som er gjort, seier Geir Heldal.

Rettsleg krav?

Det er allereie gang- og sykkelveg forbi barehagen, frå Vallabrua og innover Hegglandsdalen. Kravet gjeld frå Vallabrua og ut til Hatvikvegen.

I mellomtida har Lyssand Treindustri, som ligg langs strekket som er utan gang- og sykkelveg, fått dispensasjon, mot at dei "la til rette for komande gang- og sykkelveg".

Også smeden Johs Sælen har fått bygga i Hegglandsdalen, innanfor der barnehagen kjem, og slik flytta mykje tungransport lengre inn i Dalen frå dagens plassering ved Vallabrua til næringsarealet inne ved Lien-fabrikken.

Om Sælen treng dispensasjon, eller har fått dette, kan verken Skaatun, Heldal eller førre leiar for utvalet, Gustav Bahus, svara på.

– Kommunen har ikkje plikt å gje dispensasjon frå rekkefølgekravet, men dei kan gjera det. Med den langdryge saksbehandlinga og den mangelfulle og villeiande måten Os kommune har kommunisert med Borgafjell Barnehage på, synes eg at dei burde gjeve dispensasjon.

– Det er også mogleg at Borgafjell Barnehage har eit rettsleg krav om dispensasjon i denne saka her, seier advokat Ringheim