Laila i Midtsiden-redaksjonen

Stortingsrepresentant Laila Reiertsen (Frp) frå Os går snart inn i sitt, i denne runden, siste av fire år på Tinget. Som medlem av arbeids- og sosialkomiteen har ho fleire gongar hospitert ved ulike arbeidsplassar, blant anna på Os sitt NAV-kontor.

– Eg har også vore i privat sektor, for eksempel begravelsesbyrå og frisørsalong. Det er noko å læra alle stadar og eg tar gjerne imot tips og invitasjon om andre arbeidsplassar vil ha besøk, seier Reiertsen.

I veke 35, frå 27. til 31. august, vil Laila vera på plass i Midtsiden-redaksjonen.

Ut i felten

Medan tidlegare hospitering stort sett har vore ein studie av alt frå utfordringar, rutinar, leiing og praksis med lærlingplass, vil Laila hos Midtsiden vera mest mogleg operativ.

– Sjølv om eg har brukt saks før så fekk eg ikkje klippa hår då eg var utplassert i frisørsalong, men hos Midtsiden har eg lyst å prøva meg med penn og kamera.

– Eg vil sjå på korleis avisa blir driven, det er også interessant, og så vil eg ut i felten og snakka med folk.

Ber om ønskje og forslag

Laila har allereie nokre meiningar om kva type saker ho vil laga.

– Eg styrer nok unna politikk, elles er eg open for det meste, anten det er næringsliv, sport eller kultur. Det eg er mest interessert i er gode historiar, gjerne personlege opplevingar, anten det er snakk om eit spesielt bryllaup, ei spennande reise eller ei spesiell oppleving, gjerne der fleire generasjonar er involvert.

Har du ei historie du vil dela med Laila og Midtsiden sine lesarar?

Ta kontakt med redaktør Kjetil Vasby Bruarøy på kjetil@midtsiden.no eller 90789270. Om du har ei sak du vil diskutera med Reiertsen når du ho på mobil 951 27 555.