Just Olsen lager verdas beste spel
Osingen Ivar Just Olsen er sentral i utviklinga av NBA 2K, som nyleg danka ut blant andre FIFA14 i kampen om tittelen verdas beste sportspel.
Bildeserie:
Pappa Erik Just Olsen er ei levande fotball-legende i Os. Sjølv er sonen Ivar kanskje endå meir kjent for sport, men ikkje som utøvande deltakar.
Ivar bur i California og jobbar for det verdskjente spelutviklingselskapet Visual Concepts, søsterfirma av Rockstar, som blant anna står bak Grand Theft Auto.
Nyleg blei Visual Concepts tildelt The VGX-prisen for beste sportspel i 2013, basketball-spelet NBA 2K14.
Les meir om spelet på 2k.com og sjå trailer i botn av artikkelen.
Blant dei andre nominerte var FIFA 14 og NHL 14.
Starta med Commodore 64
Ivar bur i Novato, cirka 30 minutt med bil nord for San Fransisco. Han er gift og har to born, ein gut og ei jente på snart 8 og 11 år.
Han vaks opp i Os etter at familien flytta til Mobergslia då han var 5 år. Då han i 1983 var 12 år kom faren heim med ei datamaskin av typen Commodore 64, og Ivar byrja med programmering.
– Eg blei etterkvart medlem i ulike dataklubbar og blei ganske aktiv i noko som heiter “demo scene”, der eg i 1987 starta ein eigen klubb med “Cryptoburners”, fortel Just Olsen.
Han dreiv vidare med data som hobby fram til 1995.
Valte jobb framfor skule
Etter Os gymnas, i 1991, tok han eit år i marinen, der han mesteparten av tida var kvartermester i Trondheim.
Etter marinen tok han nokre kurs for å førebu seg på ingeniørstudie i Bergen, men så langt kom han aldri.
– I juni 1993 fekk eg tilbod om jobb i eit nystarta spelutviklingselskap i Oslo. Eg takka ja til Funcom, først med plan om å byrja med skule hausten same år.
Han fekk plass på HIB, men valte å bli verande i jobben.
Jobb og kone i Irland
I 1995 ville Funcom starta avdeling i Dublin i Irland, og Ivar blei spurd om han vil hjelpa til med oppstarten
Der blei han verande i fem år.
– Mens eg var i Irland jobba eg på eit bil-spel for PlayStation 1, eit spel som heitte “Speed Freaks”. Det fekk veldig god kritikk.
Der var i Irland Ivar møtte Claudia, som han gifta seg med i 1999.
14 år i USA
I starten av 2000 fekk Just Olsen tilbod om jobb i Visual Concepts, som den gong hadde kontor i San Rafael nær San Francisco.
Visual Concepts var då eigd av Sega.
– Vi sa ja takk og flytta til California i april 2000.
Frå start jobba han med fleire sportspel, NFL 2K, NBA 2K, MLB 2K og NHL 2K, som blir oppgradert kvart år.
– Bestseljaren var NFL 2K, som til slutt selte rundt tre millionar kopiar årleg. Men i 2005 mista vi NFL-lisensen.
Seinare i 2005 blei selskapet selt til eit forma som heiter Take Two Interactive, som no sel spela frå VC under 2K Games og 2K Sports.
Take Two eig også firmaet Rockstar, som lager spelet Grand Theft Auto.
Kan vinna fleire prisar
Just Olsen jobbar som lead software engineer i library and technology-gruppa i firmaet. Hovudoppgåva hans er utvikling og support av deira 3D-engine som blir brukt i spela deira.
Han har også utvikla ein eigen C++compiler som blir brukt i spel og "tools".
Take Two Interactive har fleire tusen tilsette. Dotterseskapet Visual Concepts, som har rundt 150-200 tilsette, har no kontor i Novato.
Bestseljaren i dag er basketballspelet NBA 2K, som sel over 5 millionar kopier kvart år. I tillegg til godt sal har det blitt fleire prisar på Just Olsen og kollegaene.
– Vi har vunne VGX-prisen fire år på rad, i tillegg til i 2006.
– Det som var litt spesielt med 2013 var at det var første året på PS4 og Xbox One, spelmaskiner som gjorde det mogleg å laga mykje betre grafikk, fortel Ivar til Midtsiden.
I tillegg til årets sportspel har Visual Concepts også blitt nominert til "Outstanding Real-Time Visuals in a Video Game”.
Trivst i California
Ivar synest han og familien har det veldig godt i California. Han bur berre nokre kvartal frå kontoret, og på veg til jobb om morgonen tar han seg ei treningsøkt på det lokale helsestudioet.
– Det er eit hyggeleg nabolag og det meste er lett tilgjengeleg i nærområdet.
– Vi har sommar frå mai til oktober, av og til ut i november. Hamna har mykje å by på og det er fleire flott strender innan rekkevidde.
– Hugsar du såpeoperaen Falcon Crest? Den blei spelt inn i Napa-dalene rett i nærleiken av der vi bur. Det er mange fine område og vingardar å besøka.
Norske tradisjonar blir også haldne ved like i California.
– Kvart år på 17. mai går vi inn til San Francisco utanfor den norske sjømanskirka, der dei arrangerer tog og aktivitetar for ungane. Der er det sal av pølser, brus og is, stylteløp og potetløp, fortel Ivar.
– Har de vurdert å flytta tilbake til Europa?
– I så fall måtte det blitt til Irland eller Noreg. Akkurat no har vi det fint og eg trur vi blir verande.
– Men vi prøver å koma oss heim annakvart år. Eg vil at ungane våre skal få oppleva litt av det same som eg opplevde då eg vaks opp, seier Ivar Just Olsen.
VIDEO: Trailer av NBA 2K14.