Lager idrettsgalla

– Det har vore snakk om dette i mange år, og no var det ein ledig laurdag i Oseana, og då tenkte vi det var på tide å slå til, seier dagleg leiar i Os Turn, Hans Parnefält.

– Vi har nesten 1300 medlemmar og mykje å feira, kvifor skal ikkje vi ha vår eigen idrettsgalla? spør han.

Middag og prisutdeling

Målet var å få til ein årsfest før jul, i staden blir det laurdag 11. januar.

På flatt golv i Oseanasalen vil Parnefäløt ha flest mogleg medlemmar frå dei seks avdelingane i idrettslaget.

– Vi har cheerleadarar, amerikansk fotball, fridrett, turn, handball og fotball.

– Årsfesten blir open for alle medlemmar, unge og vaksne, der vi har middag og litt merksemd til personar som har utmerka seg.

I 22-tida er middagen over og dei yngste går heim.

– Då opnar vi dørene for andre som vil inn, og inviterer til dans med livemusikk på scenen.

Kven skal Maggen tulla med?

Til å vera konferansier har Os Turn fått inn Magnar "Maggen" Lien.

Maggen er for mange i Os kjent som revymann og standupkomikar, sommaren 2009 fylte han nattklubben Opus helg etter helg med showet "Stolt, gamal gris".

Les òg: – Betre enn Lyngbø

– Kven skal du vitsa om denne kvelden?

– Det har eg ikkje bestemt meg for. Men eg trur det er nok å ta av, og Bakkerud skal ikkje føla seg for trygg, humrar Maggen, som også har fartstid som idrettsutøvar.

I 1975 var han med på å ta sølv i kretsmeisterskapen i fotball med Os sitt juniorlag.

– For å ha det kjekt saman

På scenen etter middagen kjem ORBO, Gina Aspenes og Leif Østrem.

– Vi ville prøva dette, å laga ein staseleg middag der også ungdomane kan vera med, og ein skikkeleg fest etterpå.

– Dette gjer vi som eit non-profit-arrangement, ikkje for å tena pengar, men for å ha det kjekt saman. Så håper vi at alle som vil får plass, og at vi blir mange nok til at det blir ein kjekk kveld, seier Parnefält.