Lager bru over Lyseklostervegen
I førre veke kom kranen på plass, men det blir inga stenging av fv 163 Lyseklostervegen før fellesferien er over.
Bildeserie:
Som del av E39 Svegatjørn-Rådal blir det jobba med ny fylkesveg frå ny E39 frå Endelausmarka til Åsen, med nytt trekant-kryss for tilkomst til fv 163 Lyseklostervegen og ein eventuell vidareføring, Åsen - Helleskaret.
Les òg: Vil forskottera fylkesveg
Vegen frå Endelausmarka skal både gå gjennom eit skar, som er nesten ferdig gravd ut, og på bru over både augestikkar-myr og Lyseklostervegen.
– Brua over Lyseklostervegen blir med 4,30 meter høgde, så Lyseklostervegen må seinkast noko, seier driftsleiar Vidar Mjelstad frå Veidekke.
Nattarbeid og stenging
Sjølv om kranen er på plass er det ei stund til det byrjar å koma element over Lyseklostervegen gjennom Åsen.
– Forskaling og støyping av brua blir i starten på august. Då blir det ein periode med nattarbeid og stenging.
– Kranen får vi bruk for også før den tid, med fundamenta vi no bygger på kvar side, seier Mjelstad.
Tidleg tilkomst til Lyseparken
Mens E39 Svegatjørn-Rådal skal stå ferdig først i 2022 vil den nye fylkesvegen inn til Endelausmarka bli tatt i bruk lenge før.
– Anleggsvegen skal fjernast og Skogafjellstunnelen, når den er ferdig, blir ny anleggsveg.
– Men Fylkesvegen inn til Endelausmarka skal opna for sivil bruk lenge før, eg lurer på om ikkje den skal vera klar i 2017. Det blir ein blindveg, men den gir tilkomst til Lyseparken parallelt med bygginga av E39.
Midtsiden samleside: E39 Svegatjørn-Rådal