La karnevalet byrja!
Bildeserie: I ettermiddag byrjar karnevalet i Rio, elevane i 1.-4. klasse på Nore Neset tjuvstarta feiringa i førmiddag.
Bildeserie:
Med feiande flotte kostymer, sambatakter og opptog til gymsalen starta elevane på småskulen på Nore Neset skule karnevalsfeiringa berre timer før det braker laus med eit av verdas mest kjende karneval i Rio.
- Kvar av klassane dressa seg opp i klasseromma før vi gjekk i opptog inn hit, fortel Pieter Derksen, klassestyrar i 4 A.
Enkelte av klassane tok seg òg tid til å læra seg litt samba før samlinga i gymsalen. Med lærar som har budd i Brasil og ein elev med mor frå same landet fekk 2. klassingane god veiledning i dei smekre rytmane.
- Eg blei overraska over kor ivrig gutane var, medan jentene sto litt sjenerte og såg på, kasta dei seg ut i dansen, fortel lærarne.
Skaper samhald
Karnevalet må kunne beskrivast som ein suksess. I gymsalen blei det både trivselsdans, limbo og Gangnam Style. At elevane koste seg er det liten tvil om.
- Dette er utruleg kjekt, også skaper det eit samhald på tvers av klassene som er utruleg viktig, fortel klassestyrar i 3C, Marie Stangeland Lunde.
Mykje kreativt
Sjølv om det ikkje har vore tid til å sy kostymer i timane, var det mange kreative innslag og truleg mange timer som hadde gått med ved symaskinane rundt dei mange kjøkenborda på Nore Neset.
Både spøkelser, politimenn, klovnar og bosstrollet med tre hovuder frå Kolskogen hadde funne vegen til skulen fredag.
I kåringa av beste kostyme blei det delt første pris mellom bosstollet og Linda, som stilte i ein ekte karnevaldrakt frå Brasil.
Karneval feirast som inngongen til fastetid og startar normalt 40 dagar før 1. påskedag.