Kvinne tatt for tjuveri
Mistenker at ho har vore i same ærend fleire gongar.
I 19-tida søndag blei ei kvinne tatt for tjuveri frå ein butikk på Amfisenteret.
Politiet blei tilkalla, og rykte ut til staden.
– Vedkomande, som er i 30-åra, er meldt, opplyser politioverbetjent Atle Birkeland.
Varene er levert tilbake til butikk. Det er mistanke om at ho har vore der fleire gongar i same ærend.
Tok beslag i førarkort
Klokka 13.05 søndag fekk politiet melding om trafikkulykke i Os sentrum.
Ein person hadde blitt påkøyrd i fotgjengarfeltet på Hatvikvegen mellom Torggata og Esso.
– Fotgjengar blei køyrd til Haukeland med ukjent skadeomfang, opplyser Birkeland.
Vedkomande er ein vaksen mann.
– Bilførar, ei kvinne i slutten av 60-åra, fekk førarkortet beslaglagt på staden.
Sak er oppretta.
Brann i ny pipe
I 12.30-tida rykte politiet ut på melding om mogleg brann i Gymnasvegen.
Det hadde vore opne flammar i samband med matlaging, men utvikla seg ikkje til brann.
Ingen personar blei skadd. Politiet har oppretta sak.
I 15.20-tida kom det melding om pipebrann på Søre Neset.
– Ingen personar blei skadd. Det viste seg å vera brann i ei heilt ny pipe, opplyser politiet.
Båt trengte assistanse
Det har vore mykje nedbør i helga, spesielt frå fredag til laurdag. Det har gått fleire ras og skred i indre delar av Vestland, men i Os har vêret bydd på færre utfordringar.
Søndag formiddag hadde verken teknisk vakt i Bjørnafjorden kommune eller brannvesenet noko på blokka, med unntak av at dei som forebyggande tiltak stengte Ole Bulls veg med bom.
Og med unntak av ein seglbåt på rek.
– Vi fekk ein førespurnad frå Hovedredningssentralen i samband med ein båt som dreiv utanfor Hatvik. Vi har ikkje båt for den typen oppdrag, slik forholda var, og anbefalte dei å kontakta ferja, noko dei ville gjera, seier varabrannsjef Erik Walden.
