Kvinne (83) lurt for 10.000

Ein Midtsiden-lesar åtvarar osingar mot ein utanlandsk teppeseljar etter at mora hans denne veka blei lurt til å kjøpa orientalske teppe for 10.000 kroner.

– Han lokka med gratis teppe, men enda med å overtala ho til å kjøpa fem teppe.

– Han kjørte ho til minibanken og reiste med pengane utan å legga ifrå seg kvittering, fortvilar sonen til den 83 år gamle kvinna.

Sånn gjekk seljaren fram:

• Først ringte han og sa at han, grunna to hjarteinfarkt, ville legga ned butikken sin.

• Han sa at kvinna var tidlegare kunde og hadde blitt trekt ut som vinnar av eit av teppa han hadde på lager, eit lager som no skulle tømast.

• Han inviterte seg heim til kvinna for å levera teppet, men vel framme på Os viste det seg at det ikkje var nokon gevinst likevel. Då starta seljaren på gebrokkent norsk å overtala kvinna til å kjøpa teppe.

– Føler seg lurt

Kvinna blei overtalt til å kjøpa heile fem teppe av mannen, til ein samla pris på 10.000 kroner.

– Han spelte på samvitet hennar og spurde om ikkje vi ungane hennar hadde vore flinke å hjelpa ho, at ho kunne gje oss eit teppe som takk. Men eg er ikkje interessert i noko teppe, fortel sonen hennar.

Den eldre kvinna spurde etter kvittering, men seljaren sa at han hadde det travelt og skulle til England å studera. Men ho skulle få kvittering når han kom heim.

– Han skal ha vore svært veltalande, og då han hadde reist følte mor mi seg lurt.

– No vil ho bruka angreretten, og vi kjem til å ta kontakt med politiet for å få hjelp til å spora han opp igjen.

Vil åtvara andre

– Eg vil samstundes åtvara andre mot denne metoden.

– Det ser ut som om seljaren siktar seg inn mot eldre einslege, så det kan vera verdt å ta ein prat med foreldra sine om dette, så ikkje fleire osingar endar opp med mange teppe dei eigentleg ikkje vil ha.