Kvar er drikkevatnet?
Reservevasskjelda til Os, Hovlandsvatnet, er «litt» redusert.
Bildeserie:
Det er nokre meter frå demninga og ned til vasskorpa etter at reservevasskjelda til Os har blitt tappa ned.
– Vi visste om nedtappinga og tok oss ein tur for å sjå. Det var litt av eit syn, seier Geir Skarding, som har sendt oss bilde frå dammen.
Planlagt vedlikehald
Årsaka til den noko låge vasstanden er planlagt vedlikehald.
– Etter pålegg frå NVE, som har tatt ei revurdering på dammane, skal vi støypa på ei ny plate på demninga, fortel prosjektleiar Agnete Haugland frå Os kommune.
– Eg veit ikkje kor tid Hovlandsvatnet sist var tappa ned, men nedtapping var ganske vanleg på 60- og 70-talet.
– Ser de ekstra mykje fisk no når vatnet er så grunt?
– Det er ikkje lov å fiska eller bada i drikkevatn. Det er fisk i vatnet, men i drikkevatn er det berre grunneigar som har lov å fiska.
Har litt i reserve
Arbeidet skal halda fram til månadsskiftet oktober-november.
– Det vil bli laga ein fangdam, med ledningar som midlertidig løysing, men vi håper at vi ikkje får kluss med dei ordinære drikkevasskjeldene våre i denne perioden, sa teknisk sjef til Midtsiden før nedtappinga starta.
Les òg: Uroa for vassforsyninga
Dei som får vatn frå Søvik er ikkje råka, Hovlandsvatnet er reservekjelde for Krokavatnet.
– Vi har laga ein beredskapsplan som gjer at vi har reservevatn for tre dagar om noko skulle skje med forsyninga frå Krokavatnet, seier Kramer.