– Kva skjer på Lekven?

I mai i fjor blei eit bustadprosjekt i Lekvenvågen lagt ut for sal. På 5 dagar blei 6 husvære selt, ikkje så lenge seinare var 11 kjøparar på plass.

Les òg: Knallstart på Lekven

Men byggestart blei ikkje i haust som planlagt, og no lurer fleire på om prosjektet er skrinlagt.

– Dei sa det skulle vera byggestart hausten 2011 og innflytting hausten 2012. Men det har ikkje vore graving på tomta og informasjonen vi har fått frå seljar har vore knapp, seier ein av kjøparane, Ole Christian Brekke.

Han og dei tre kameratane som gler seg til å flytta til Lekvenvågen reagerte på at dei gjennom sommaren ikkje fekk statusrapport.

– Om ikkje meir så hadde eg rekna med ein epost i månaden der dei fortalte om framgangen.

"Rett rundt hjørnet"

Brekke kontakta tiltakshavar Arkiton AS for å be om informasjon, først per telefon.

– Eg fekk det same svaret kvar gong, at byggestart var "rett rundt hjørnet". Etter ei stund forsto eg at det her kunne vera lurt å få ting skriftleg, så då byrja eg å kommunisera per epost.

– Svara har variert mellom at dei er "rett rundt hjørnet" eller at dei "berre skal selja eitt husvære til".

Manglar finansiering

Hos Arkiton AS fortel dagleg leiar Arne Abelsen om årsaka til utsett byggestart.

– Sjølv om vi har hatt godt sal på dette har vi ikkje lykkast med å få finansiering på plass. Dette jobbar vi framleis med og vi håper på å vera i mål ganske snart, seier Abelsen.

– Det er eit flott område og eit veldig bra prosjekt, så det er synd at vi fekk denne utsetjinga. Rammeløyve er på plass og vi har dialog med lokal entreprenør, så vi er klare til å starta så snart banken er klar.

Har mista nokre kundar

Abelsen seier han har fått ein del epostar og telefonar frå kjøparar, og innrømmer at enkelte av dei har vore skuffa.

– Nokre få har trekt seg, men vi har framleis fleire som ventar på at vi skal bli klar. Når den tid kjem får vi gå ut i marknaden å selja igjen, seier Arne Abelsen.

– Bør ikkje halda oss varme

Ole Christian Brekke har ikkje tillit til at Arkiton får finansiering, og føler han har blitt dårlig behandla.

– Eg har selt der eg budde før og leiger no eit lite husvære medan eg ventar på å flytta inn i ny kåk i Lekvenvågen. Eg synes ikkje det er rett at seljar driv og held oss varme ved å seia at ting snart er i gang. Kor lang tid kan dei trenga på å skaffa finansiering med så godt sal som utgangspunkt? spør Brekke.

Kjenner seg ikkje igjen

Abelsen seier han ikkje kjenner seg igjen i kritikken til Brekke og at Arkiton har informert om status og vore open med kjøparane.

– Kjøparane har ikkje teikna kontrakt, men skrive under på eit bodskjema som gjeld i seks månadar. Denne perioden er over, så partane står fritt til å trekka seg.

– På grunn av nettopp dette med mangelfull finansiering så har vi ikkje forlenga avtalane med dei som i utgangspunktet hadde kjøpt. Men vi er sjølvsagt like ivrige etter å koma i gang som dei er, og håper på å halda på flest mogleg av dei som i utgangspunktet var kjøparar, seier Abelsen.