Kva skjer med årets kull?

Denne veka har 2000-kullet fått veta kven dei kjem i klasse med til hausten og vore på besøk på ungdomsskulane dei skal byrja på.

Men kva skjer med klassane når den nye ungdomsskulen på Nore Neset står ferdig hausten 2014?

Denne skal nemleg husa elevar frå Søre Neset, som til no har gått på Os ungdomsskule, og Lysekloster, som går på Søfteland. I tillegg til dei frå Nore Neset, Strøno og Øyane.

Held på klassane

Søfteland skal gå frå å vera 1 til 10-skule til å vera barneskule. Ungdomsskulelevane frå Søfteland blir flytta til Os.

– Betyr det at sørenesingane som startar på Os ungdomsskule hausten 2013 blir flytta til Nore Neset i 2014? Kjem det då elevar frå Søfteland for å starta på Os i 9. klasse i 2014?

– Nei. Alle klassane som startar på ungdomstrinnet i år blir verande som dei er. Klassane på Os blir verande på Os, klassane på Søfteland blir verande som dei er, men blir flytta til den nye skulen på Nore Neset, seier kommunalsjef Ingvar Torsvik.

I tillegg blir naturlegvis ungdomsskuleelevane på Nore Neset flytta til den nye skulen på nabotomta.

– Så den nye skulen skal fyllast gradvis?

– Den blir ganske full frå start, med elevar frå alle trinn på Nore Neset og dei eksisterande som i år startar i 8. klasse og 9. klasse på Søfteland.

Kuvågen til Os

– Kva med opptaka neste år, blir det frå Lysekloster og Søre Neset som planlagt, dei som skal byrja i 8. klasse hausten 2014?

– Ja, men det ligg an til å bli nokre unntak for Søre Neset-krinsen. Nokre av dei som i dag går på barneskule på Søre Neset kjem til å gå på ungdomsskule på Os.

– Dette gjeld dei som svinger inn ved Kiwi Moberg når dei skal heim, altså elevar frå Kuhnle, Sollia og Kuvågenområdet, fortel Ingvar Torsvik.