– Kva med indre trasé?

29. januar arrangerar Os kommune eit ope temamøte om Kyststamveien E39 for kommunestyret. Tysdag blei programmet for møte kjent, noko som fekk brumotstanderane til å reagera.

- Programmet for temamøtet har alt for stor slagside for midtre trasé. Det må vi få protestera på det kraftigste mot.

- Vi meiner at Vegvesenet har opptrått som ein politisk aktør, Victor Normann har levert underlaget til vegvesenet og meiner det same som dei.

- Når det i tillegg er ingen som fortel om fordelen med indre trasé, eller om samfunnsfordelane som kan oppnås med denne, så blir det ei slagside for det midtre alternativet, meiner Vibeke Harild i folkeaksjonen mot bru over Bjørnefjorden.

Vil ha ekspert på indre trasé

I programmet er vegvesenet fått 45 minutt til å presentere konsekvensutgreiinga for E39 Aksdal-Bergen, Victor Normann 25 minutt for å presentera dei samfunnsmessige effektane av å binda samen Vestlandet og folkeaksjonen 20 minutt for å presentere deira syn.

- Særleg meiner vi det er problematisk at Victor Normann blir ståande uimotsagt ettersom han sin rapport er blitt kraftig imøtegått frå fagmiljø i Noreg.

- Vi meiner det er av heilt avgjerande viktigheit å kalla inn fagfolk til å presentera fordelane med indre trasé, seier Harild som saman med dei andre i folkeaksjonen har foreslått at Terje Raunsgård skal få plass i temamøtet.

Ikkje einig

Ordførar Terje Søviknes (Frp) er ikkje einig i at Raunsgård bør få taletid.

- Det meiner eg blir heilt feil.

- Terje Raunsgård driv nærings- og arealutvikling i Fusa. Det blir for snevert å tenkje berre næringsutvikling i Os og Fusa i denne samanhengen.

- Når det gjeld uroa over at ikkje indre trasé vil bli presentert har eg tillit til at Statens Vegvesen presenterer båe alternativa i møte, seier Søviknes.

Vil ikkje bli alibi

Folkeaksjonen seier sjølv at dei ikkje er ekspertar på indre trasé.

- Vårt utgangspunkt er motstand mot monsterbru og motorvei.

- Slik programmet er utforma blir vi i folkeaksjonen brukt som alibi frå Søviknes si side. Ved å invitera oss trur Søviknes at han framstår som at alle sider får presentert sitt syn, hevdar aksjonistane.

- Det er ikkje rett.

- Det vi skal handsama i kommunestyret er del av ein planprosess som Statens Vegvesen har vore ansvarlege for, nemleg konsekvensutgreiinga for E39 Aksdal-Bergen.

- Kommunestyret har tidlegere handsama kyststamvegen og gjekk då inn for at både midtre og indre trasé skulle jobbast vidare med.

- Då er det naturleg at vi får presentert det materiellet som vegvesenet har utarbeidd før vi går vidare med den politiske handsaminga i kommunestyret, forklarar Søviknes.

Ville sleppa aksjonsgruppa til

Sidan møtet er eit temamøte for kommunestyret kor grunnlaget for vidare politisk handsaming skal bli presentert kunne ordføraren nøyd seg med å la kun vegvesenet og deira folk få taletid på møtet.

- Vi har jo lagt merke til engasjementet til folkeaksjonen og meinte det var rett at også dei fekk moglegheiten til å presentera sitt syn direkte til dei folkevalde i eit formelt kommunestyremøte.

Aksjonar på utsida

Det som ikkje vil bli tillatt er spørsmål/ytringar direkte frå salen.

- Reglementet for Os kommunestyre og kommunelova slår fast at det ikkje er tillatt med ytringar/spørsmål direkte frå salen.

- Det er heller ikkje tillat å formidla eit politisk bodskap gjennom t-skjorter, banners eller lignade i møtelokalet i følgje reglementet.

Det at ein arrangerar fakkeltog og markerar synspunkta på utsida av møtelokalet er ikkje regulert av arrangementet.

- Om aksjonsgruppa har spørsmål til vegvesenet eller Victor Normann kan dei stilla dei i sitt eige innlegg, forklarar Søviknes.

Dei einaste som kan stille spørsmål undervegs i møtet er dei 35 folkevalde som sit i kommunestyret.