– Kva bygd er det vi vil ha?

• Følg Midtsiden på Facebook
• Følg Midtsiden på Twitter

Brumotstanden står ved lag etter 15-20-tapet i kommunestyret tysdag.

– Målet vårt var at Os kommune skulle seia eit tydeleg nei til dei skissene vegvesenet har for midtre trasé. Dei har teikna brua til Øyane, ikkje til Bjørnatrynet, og dei har ikkje skissa vegen vidare i tunnel.

– Vi burde vist vegvesenet at dei må koma med noko betre. I staden har kommunen i praksis no gjeve sentrale styresmakter ei blancofullmakt, meiner Geir-Magne Johnsen (TvS).

– Naivt å tru at dyre alternativ blir valt

At Os kommune i sin uttale seier klart ifrå om kva landingspunkt kommunen prioriterer, og med krav om tunnellar frå Bjørnen til Svegatjørn, trur Johnsen har liten effekt.

Det same gjeld for LMG Marin, som seier dei fint kan laga bru direkte til Bjørnen, langt billigare enn vegvesenet si bru til Øyane.

– LMG er ein bru-seljar. Eg jobbar også med sal og det er ikkje problem å selja inn eit billig innsteg, for seinare å utvida behov og pris. Og prislappen på tunnel frå Bjørnen til Svegatjørn kunne eg tenkt meg å sjå.

– Det vi ofte ser igjen ved byggeprosjekt er budsjettsprekk og innsparing, og når det er for seint å snu og for dyrt med tunnel eller lang bru, så kan det fort bli invitert til tidenes kamel-måltid i skjergarden i Os.

– Brått blei brua dyrare og måtte leggast i land ein annan stad og brått blei det ikkje pengar til tunnel frå Bjørnen til Os. Vil vi verkeleg risikera dette?

Kor stor skal Os bli?

I kommunestyret tysdag var Johnsen opptatt av verdiar, om traséval som verdival, om kva som er viktigast for Os, ikkje berre om 20 år, men om 50 og 100 år.

– Kva verdi har gjennomgangstrafikk? Kva er mest verdt om 100 år, eit stor næringsareal eller ei idyllisk bygd med fin natur?

– Os vil alltid ligga nær Bergen og i framtida vil nok bygd og by nesten veksa saman. Eg trur ikkje mangel på vekst vil bli noko problem, spørsmålet er korleis vi vil styra utviklinga, kva vil vi ta vare på i Os, kor tid er Os stor nok?

Johnsen fryktar at desse spørsmåla skal drukna i snakk om "gullakse", kortsiktig næringsutvikling og tekniske detaljar om brutype og tunnelar.

– Eg forstår rett og slett ikkje kvifor det er verdt å kjempa for midtre trasé. I tillegg gløymer vi jo heilt å sjå alle fordelane med indre trasé, å knyta til oss Fusa og Hardanger, nabobygdene våre i indre delar av fylket, med stort byggeland og god turistnæring.

– Kva veit vi om kva som blir viktig om 50 år og seinare, er det offshore, olje og gass, eller er det andre næringer - eller rett og slett verdien av ein idyllisk skjergard og urørt natur.

Jobbar vidare

Johnsen, som i tillegg til å vera politikar på Tverrpolitisk Samlingsliste, er med i folkeaksjonen "Nei til bru over Bjørnafjorden".

Han seier motstanden står ved lag og aksjonsgruppa jobbar vidare med si sak.

– Vi skal ha møte måndag og diskutera vegen vidare.

– No vil vi jobba inn mot departementet og sjå om vi klarer å unngå den verste katastrofen, seier Geir-Magne Johnsen.