Kulturstipend til Sofie og Joakim
Skyttar Evensen og kappgjengar Sælen får 20.000 kroner til ny rifle og nye sko.
Bildeserie:
Onsdag kveld, rett før Os kulturskule sitt første av to juleshow om nissen Borg tok til, blei Os kommune sitt kulturstipend delt ut.
Stipenda blei delt ut av Os formannskap ved ordførar Terje Søviknes, assistert av kultursjef Lisbeth Axelsen.
Kvart av stipenda er på 20.000 kroner.
– Begge går i år til idrettsutøvarar innan idrettar som ikkje er så store, men som har lange og gode tradisjonar i Os, sa Søviknes før han presenterte dei to vinnarane.
Sofie Evensen (13), som er yngste som har mottatt dette stipendet til no, har hatt eit forrykande år på skyttarbanen. Ho har vunne 11 av 35 stemne, og er blant anna samlagsmeister, krinsmeister og noregsmeister.
Neste sesong skal ho opp ein årsklasse, og skal kjøpa seg ei ny Sauer-rifle. No har ho 20.000 kroner ekstra på budsjettet.
Joakim Sælen (22) har drive med kappgang sidan han var 7 år. Han har vunne NM innandørs og tatt to sølv utandørs. Joakim har òg deltatt i junior-VM (2012) og har som mål å kvalifisera seg til OL i Rio i 2016 og VM i Lopndon i 2017.
– Joakim treng gjerne ikkje like dyrt utstyr som Sofie, men han slit ut 10-12 par sko i året, og har dessutan mål om mykje reising, sa Søviknes.