Kultursjefen utfordrar ungdomsrådet

På denne tida av året plar 50 til 100 ungdomar i kommunen driva med øving og finpuss på dans, song, kunst og konferansier-rolle til UKM (Ung Kultur Møtes).

• Sjå video og bildeserie frå UKM 2020

Men i år veit ikkje verken ungdomen eller kultureininga i Bjørnafjorden kommune om UKM blir utsett eller avlyst.

– UKM er eit nasjonalt arrangement. Det kjem ikkje fram av heimesidene, kva planen er, og det er samtidig usikkert om det blir justeringar av smittevernreglar i månadane som kjem, seier kultursjef Erik Vangsnes.

– Anten det blir utsett eller avlyst, synest eg det er synd om ikkje ungdom som driv med musikk, dans og annan kultur får utfalda seg og vist seg fram snart, legg han til.

Som idretten fryktar han fråfall og redusert interesse, å ha ein stad å visa seg fram kan vera noko å strekka seg etter. Det kan gi både inspirasjon og god utvikling.

Rettar spørsmål til ungdomsrådet

UKM skal ikkje berre inkludera unge arrangørar, det skal ideelt sett drivast fram av ungdomen.

No vil kultureininga senda ballen over til ungdomsrådet.

– Ungdomsrådet har møte førstkomande måndag. Vi på kultureininga har laga eit saksframlegg vi ønskjer dei skal drøfta.

Spørsmål dei vil ha opp til drøfting er:

• Er det realistisk å gjennomføra eit stort fellesarrangement etter modell frå tidlegare år?
• Er det aktuelt å dela det store arrangementet opp i delarrangement?
• Skal vi legga vekt på framføring av ferdige produkt eller samspel/ samarbeid/ verkstad?
• Kor mange kan vi vera? Kor skal vi ha aktivitet?
• Kva har vi kapasitet å få til? Når skal vi ha aktivitet?

– Anten det blir under UKM-paraplyen eller ikkje, så håper eg det kjem fram nokre arrangement som både er smittevernvenlege og skaper aktivitet, seier Vangsnes.

Medlemmane i ungdomsrådet: Abdalruhman Al-Saed, Victoria Elise Lid, Ella Louise Sundt, Emma Bratholmen Særvold, Joachim Reuter, Martin Bakke Slåttsveen, Vegar Klyve, Ida Anette Isdahl, Ingvild Østby og Irmelin Lygre.