Krangla og stakk
Mannen var ikkje einig med Vegvesenet og stakk frå kontrollen i avskilta bil.
Statens vegvesen heldt tysdag kontroll på Søfteland. Der stansa dei ein bil som var begjært avregistrert i november.
- Grunnlaget for avskiltinga skal ha vore at bilen blei solgt, men ikkje omregistrert, fortel politioverbetjent Terje Sperrevik ved Os lensmannskontor.
Føraren av bilen godtok ikkje avskiltinga og stakk frå kontrollposten i bilen uten skilter.
- Vegvesenet kontakta oss og vil truleg komme med ei anmelding i løpet av dagen.
Krangla med kontrollørane
Patrulja frå lensmannskontoret var ute og fekk etterkvart snakka med mannen.
- Han hadde ein anna versjon av kva som hadde skjedd og forklarte at han hadde krangla med dei på kontrollstaden i omlag ein og ein halv time før han hadde blitt så sint at han berre stakk, fortel Sperrevik.
Mannen skal ha opplevd å bli dårleg handsama av kontrollørane frå vegvesenet.
- No må partane få forklara seg, men å stikke frå ein kontrollstad i ein bil uten skilter er ikkje spesielt lurt, avsluttar Sperrevik.