Køyrde seg fast i ulovleg garn

Torsdag litt over klokka 14 fekk politiet melding om ein fritidsbåt som hadde køyrd seg fast i eit garn utanfor Rogamælsholmen.

– Garnet skal ha vore dårleg merkt, og det er mistanke om at det sto ulovleg. Fiskeridirektoratet blei varsla, og dei har overtatt oppdraget, opplyser politioverbetjent Anne Lyssand.

Det er uvisst om garnet er sett ut i samband med rømt regnbogeaure frå oppdrett i Austevoll førre veke.

Ifølgje kyst.no er fleire fiskarar engasjerte for å fiska auren opp igjen, men det kan tenkast at også privatpersonar ønskjer å fiska etter denne, med garn i overflata, noko som krev både løyve og merking. Det skal òg vera tatt oppdrettsaure i Oselvo etter rømminga.

Garn med maskevidde større enn 32 millimeter skal frå og med 1. mars til og med 30. september senkast, slik at fangstdelen står 3 meter under havoverflata, skriv Fiskeridirektoratet i lista over reglar for fritidsfiske med garn.

Politiet hadde òg noko å henga fingrane i på land.

Klokka 11.30 var det ein bil som havarerte på E39 nær Mobergsbrua over Ulvenvatnet. E39 var stengt ein periode mens det pågjekk berging i 80-sona.