Køyrde moteshow på 10-årsdagen
Hugsar du korleis Amfisenteret såg ut før 2006? Sjå bildeserie av før og etter, og frå moteshowet Baretti arrangerte torsdag ettermiddag.
Bildeserie:
I november 2006 var ordføraren på plass for å klippa snor under nyopning av AMFI Os.
Senteret var bygd saman med Europris-bygget og fekk 5000 nye kvadratmeter, nytt inngangsparti og 17 nye leigetakarar.
Åtte av desse er framleis i senteret: Baretti, Shoeday, KappAhl, Princess, Ezzenz, Baker Brun, Parfymeriet og Lysthuset.
I går markerte dei 10-årsdagen sin, dei fleste med ballongar og rabatt, mens damemotebutikken Baretti gjorde endå litt meir ut av det.
For mor og dotter
– Vi hadde lyst til å laga litt stas på kundane våre. Vi har mange faste og veldig hyggelege kundar, så då blei det kaker, kaffi, gode prisar, gåveartiklar og eit lite moteshow, fortel butikksjef Elisabeth Jansen.
14 modellar, tilsette og kundar, viste klede frå butikken. Moteshowet blei halde i og utanfor butikken og oppmøtet var godt.
– Vi har klede for både mor og dotter. Dette ville vi få fram, så vi hadde mødre og døtrer blant manekengane i går.
Nøgde stamkundar
– Dette var veldig hyggeleg, synest Kirsten Kjerrgård og Torunn Skeie.
Dei hadde sikra seg kvar sitt sete langs catwalken og fekk med seg det meste.
– Vi liker oss her, dei har så fine klede og så flinke tilsette. Moteshowet var bra, men dei hadde jo berre sånne tynne, spreke modellar, ingen sånne som oss, seier dei to (og har med det kanskje rekruttert seg sjølv til modell neste gong).