Køyrde med 2,27 i promille

I Nordhordland Tingrett tidlegare i sommar måtte ein mannleg osing i midten av 50-åra møta tiltalt for å ha køyrd bil med 2,27 i promille og utan gyldig førarkort.

Episoda skjedde ein vårdag for vel eitt år sidan då mannen køyrde frå eit drikkelag og heim til seg sjølv. Mannen blei observert av ein kjenning som reagerte på den vinglete køyringa. Vedkommande la seg difor på hjul og fulgde etter mannen heim, samstundes som han varsla politiet. Då politiet kom heim til mannen kunne dei slå fast at motoren på bilen varm. Mannen motsatte seg ransaking og blei lagt i bakken. I lommene fann politiet nøklane til den aktuelle bilen, kor på mannen tilsto å ha køyrd bilen.

Omlag 40 minutt etter pågripinga blei det tatt blodprøve av mannen. Denne viste ei promille på 2,27.

Endra forklaring

Då mannen møtte i tingretten hadde han endra meining. Han hadde ikkje køyrd bilen, i staden var det ei kvinne han ikkje kjende etternamnet på som hadde køyrd han heim.

Retten fann ingen grunn til å tru på mannen si forklaring.

Saka blei liggande

Under straffeutmålinga så retten på at mannen tidlegare hadde vore straffedømd for promillekøyring 6 gonger tidlegare, men at siste gong dette skjedde var i 2001. I tillegg la dommaren vekt på at saka hadde blitt gamal, utan at dette kunne lastast mannen. Saka har hatt ein "liggetid" i heile 2012 utan at politiet kunne forklare kvifor. Dette var grunnen til at retten fann at mannen skulle dømast til ei betinga dom.

Mannen blei etter dette dømd til 120 dagar betinga fengsel, med ei prøvetid på 2 år og ei bot på 10 000 kroner.