Korleis ta blinkskotet?
Det var utfordringa for ungdommane i Os Fotoklubb då dei hadde workshop ved Oseana tysdag ettermiddag.
Os Fotoklubb starta opp i januar 2011 med ivrige amatør- og profesjonelle fotografar som ville læra av kvarandre og utveksla erfaringar.
– Vi starta òg ei ungdomsgruppe, men vi har ikkje fått heilt dreisen på den.
– No vil vi forsøka å vitalisera den med å invitera til eit par tre workshops framover mot sommaren, fortel Silje Lepsøy.
Få mest mogleg ut av utstyret
Tysdag inviterte ho, saman med Bjarte Haugland interesserte ungdommar til å læra meir om korleis ta gode portretter med det utstyret ein har.
– Mange tek nok berre bileta på programinnstilling. Vi vil at ungdommane skal tørra å prøve seg med å justere på kameraet.
– Ein kan få til mykje spennande med å endra lukkaren, blendaren eller stilla på ISO-innstillingane, forklarar Haugland.
Breie glis
Dei 11 ungdommane følgde godt med då Haugland forklarar, og gjorde gode forsøk på modellen fotoklubben hadde med tysdag.
– I tillegg til protrettfotograferinga har vi lova dei ei overrasking, fortel Haugland løydomsfullt i det vi hører det brummar opp kjørevegen til Oseana.
Opp kjem det ein knallraud Ferrari frå Ferdinand motor. Spesielt blant gutane i flokken kom dei breie glisa fram.
– No er det berre å skyta laus. Prøv å bruk noko av den same teknikken som vi nyttar til portretta, oppmoda fotolæraren.
Litt forsiktige i starten, men etterkvart turte dei unge fotografane å nærma seg gliset frå nye vinklar.
Resultata kjem i eigen sak her på Midtsiden i løpet av veka.
– Om det er nokon som har lyst til å vera med neste gang, så er det berre å følgje med på heimesida til fotoklubben eller på facebook om ein søkjer opp Os Fotoklubb Ungdom, avsluttar Silje Lepsøy med eit smil.