Kor er musikkbingen?
Musikkbingen på Kuventræ er vekke. – Den er ikkje stolen, berre flytta til ein ny plass, ler leiar i Os rockeklubb Kjetil Osablod Grønvigh.
Då Midtsiden var på Kuventræ i samband med innbrot i klubbhuset, oppdaga vi samstundes at musikkbingen som har stått mellom kunstgrasbanen og løpebanen var vekke.
Det einaste naturlege å gjera var å kontakta leiar i Os Rockeklubb, Kjetil Osablod Grønvigh, for slå alarm.
– Du kan ta det heilt med ro.
– Den er ikkje stolen, berre flytta til parkeringa nedanfor Os ungdomsskule, ler rockesjefen.
Sentral plassering
Plasseringa på Kuventræ var ei mellombels plassering då den blei montert og opna i mars 2010.
– Kuventræ er på mange måtar dekka med rockeklubben sine lokale i kjellaren på Oshallen, så det at vi no flyttar den til ungdomsskulen er heilt uproblematisk.
– Det er kanskje ei enno meir sentral plassering enn før, med kort veg frå bussane.
– Eg håpar både nye og gamle brukarar finn seg vel tilrette med den nye staden, seier Grønvigh.
Musikkbingen blei flytta torsdag, framleis er ikkje alt på plass, så nokre dagar går det nok før den kan takast i bruk att.