– Kor blei vedtaket av?

Same dag (22. mai) som rådmannen satte siste punktum på tertialrapporten fekk tenesteutvalet den til handsaming. Då dei blei klar over overskridingane innan barnevernet ba dei om at konsekvensane av overskridingane blei presentert i ei mogleg kuttliste for formannskapet fjorten dagar seinare.

– Det meirforbruket som blei signalisert innan oppvekst- og kultur er eit politisk anliggande.

– I tenesteutvalet fatta vi difor eit samla vedtak der vi ba om at konsekvensane for oppvekst- og kultur, om heile kuttet skulle takast der, blei synleggjort og presentert for det påfølgande formannskapsmøtet fjorten dagar seinare.

– Når eg ser i sakspapira, så er dette vedtaket ikkje teke med i sakshistorikken i det heile tatt.

– Kvifor det ikkje er med lurar eg på. Men her har formannskapet gjort ein for dårleg jobb. Vi må kunne forventa at de, som kommunen sitt økonomiutval, er hands-on, tordna Helge Olav Nygard (Krf).

– Kvifor har vi tenesteutvalet?

Nygard fekk støtte frå Anders Hjelle (TvS), som sit i tenesteutvalet saman med mellomanna Nygard.

– Berre i løpet av møte steig overskridingane med 2 millionar kroner. Då blir det merkeleg at vedtaket ikkje blir lagt fram for formannskapet.

– Eg har stilt spørsmålet før. Er tenesteutvalet eit utval Os kommune har nytte av og som kommunen ønskjer å nytte? Eg tviler, hevda Hjelle som la til at han var skuffa over administrasjonen og utvalsleiar Eirik André Hesthamar (Frp) som ikkje hadde sørgja for at vedtaket kom på formannskapet si saksliste.

Hesthamar svarte at han hadde gjort det han skulle. Sørga for at vedtaket blei rett protokollert.

– Eg visste ikkje at det var mi oppgåve å sjå til at administrasjonen fekk det vidare, kommenterte Hesthamar.

La skylda på systemet

Ordfører Terje Søviknes (Frp) forklarte at vedtaket frå tenesteutvalet ikkje var kome til formannskapet grunna saks- og arkivsystemet til kommunen.

– Tertialrapporten var så fersk at den ikkje blei lagt inn i saks- og arkivsystemet på normal måte før handsaminga i tenesteutvalet.

– Det skulle ha vore handtert manuelt i etterkant, men blei ikkje gjort. Det var ikkje bevisst, det var ein forglemmelse og feil i systemet, noko eg berre kan beklaga.

Blei provosert

Varaordførar Marie Elisabeth Lunde Bruarøy (H) blei provosert av Helge Olav Nygard sin påstand om at formannskapet gjer ein for dårleg jobb.

– Eg blir litt provosert når det blir antyda at vi i formannskapet ikkje følgjer med i timen og ikkje gjer leksa vår.

– Den kuttlista som vi no har registrert var ønska frå tenesteutvalet forelå ikkje. Når vi då fatta det vedtaket vi gjorde, så betyr ikkje det at vi ikkje bryr oss. Vi sa at rammene førebels blir ståande og at tiltak for å halde rammene må synleggjerast fram mot 2. tertial, påpeika Bruarøy.

– Eg seier ikkje at de ikkje bryr dykk, men eg hadde forventa at de var meir hands-on, repliserte Nygard.

Etter ordvekslinga om kvifor vedtaket frå tenesteutvalet ikkje var lagt fram for formannskapet presenterte rådmann Knut Terje Rekve og kommunalsjef Ingvar Torsvik den etterlyste kuttlista.