Kompetansesamling på Mobergsneset
I går gjekk Midthordland kompetanseregion inn i fase to om kvalitet i skule og barnehage.
Bildeserie:
– Midthordland kompetanseregion har eksistert sidan 90-talet. I starten handla det mest om eit tverrkommunalt samarbeid om å danna ein kursarena, dei seinare åra har det utvikla seg til å handla mest om leiarutvikling, seier Per Olav Sørås.
Den tidlegare Kuventræ-rektoren, som i sommar blei tilsett som fagsjef for barnehage og skular i Os kommune, er leiar for regionen, ei oppgåve som går på omgang mellom deltakarkommunane.
Midthordland kompetanseregion består av administrativ og politisk leiing i dei seks kommunane Os, Fusa, Tysnes, Samnanger, Austevoll og Vaksdal. I går stilte rundt 50 deltakar i Oseana.
– Eg er nøgd med deltakinga frå Os i dag, både politisk og administrativt er vi godt representert, blant anna med medlemmane i tenesteutvalet, seier kommunalsjef Line Rye.
Fersk, kunnskapsbasert informasjon
Det var seniorkonsulentane Jørn-Arild Mikkelsen og Dag Langfjæran frå KS Konsulent AS, eit dotterfirma av KS, som leia seminaret.
– Det er viktig at vi har politikarane med. Det er definert i opplæringloven paragraf 13-10 at det er kommunestyret som eig grunnskulen. Då treng vi òg politisk innverknad og forankring, seier Jørn-Arild Mikkelsen.
Etter to år med seminar om kvalitet i skulen blei det i haust bestemt å gå inn i to nye år, fase to, som starta med leiarsamling i Oseana.
– Vi har seks regionsmøte for styret i alle dei seks kommunane i året. Vi har ulike nettverk, som IKT, vaksenopplæring og PPT, og arrangerer òg sensorkurs, fortel Sørås.
Temaet i går var: «Kunnskapsbasert tilnærming til god kvalitet i barnehagar og skular.»
– Alt vi baserer møta på er basert på nyare forskingsresultat og gode eksempel på ting som fungerer. Dette er ferskvare.
Korleis leiarar kan ha avgjerande effekt
– Vi har fokus på korleis leiing kan ha avgjerande effekt på skule, barnehage og resultat - på kva ungane sit igjen med.
– Vi prøver å forma og utvikla lærande organisasjonar. Også møta våre skal vera lærande forum, ein stad der alle stemmene blir høyrde, med mange gruppeoppgåver og høgt nivå av engasjement og deltaking.
– I tillegg til samlingane er vi ute til kvar kommune i tre omgangar for oppfølging og vegleiing med leiarar og mellomleiarar.
Kort veg til god læring
Å danna ein kultur for erfaringsutveksling, det å vera audmjuk og visa vilje til å bli betre, internt på kvar skule eller barnehage, er eksempel på korleis god leiing kan få avgjerande effekt på borna sine resultat.
– Vi snakkar ikkje om kvalitet på personalet, men kvalitet på det personalet gjer. Det er mange som gjer noko som fungerer godt og svært nyttig å dela dette med andre, ikkje berre på seminar som dette, men i kvardagen, men kollegaen i naborommet, seier Mikkelsen.
Mobbing og læringsmiljø
Mobbing har vore mykje i riksmedia den siste tida.
– Læringsmiljø er òg på agendaen hos oss, frå barnehage til skule.
– Sosial kompetanse og eit samfunn som endrar seg, blant anna grunna bruk av ny teknologi, er viktige faktorar, seier Dag Langfjæran.
Leiarsamlinga i går skal følgjast opp med ei samling også for rektorar, inspektørar og barnehagestyrarar på Quality Hotel Edvard Grieg på Sandsli 18.-19. februar.