Kommunale avgifter - eit hjartesukk

I Os & Fusaposten torsdag 4. april 2013 kunne me lesa om osingar som var i harnisk over store rekningar for kommunale avgifter. Her står det òg å lesa at vassgebyret har auka med 31 prosent og kloakkgebyret med 33 prosent det siste året.

I dette biletet kan me i tillegg ta med at vassgebyret auka med 11 prosent og kloakkgebyret med 30 prosent i 2012. I 2011 vart både vass- og kloakkgebyret redusert med 30 prosent. For forbrukarane er kommunale avgifter såleis vorte svært uføreseielege!

Gebyrnivået

Statistisk sentralbyrå sine tal over kommunale gebyr for 2012, viser at Os kommune kjem rimeleg bra ut. 

Men når det i Os & Fusaposten står at vassgebyret for 2013 er på 2.392 kroner og kloakkavgifta på 3.492 kroner, så er det no slik at menigmann diverre ikkje får fråtrekk for moms. Abonnentane må såleis betala 2.990 kroner i vassgebyr og 4.365 kroner i kloakkgebyr. Dette er rekna etter prisnivå frå 111 kvm til 175 kvm.

Utrekningsmåte av gebyr

Som den eldre herren påpeiker i avisa, blir vi som er eigarar av gamle hus svært urettferdig belasta med gebyr. Eldre hus er ofte i halvannan etasje, og her blir då grunnflata dobla, noko som gjer at ein ofte kjem i det høgaste intervallet ved berekning av avgift.

No kan jo eldre folk flytta til eit mindre husvære, men for nokon er ikkje dette så enkelt. Ein har gjerne budd der i ein mannsalder, og trivest, så her det snakk om livskvalitet. Det er jo også eit ynskje frå kommunen si side at vi gamle skal klara oss sjølv så lenge som mogeleg.

Det er eigentleg absurd at kvadratmeter skal leggjast til grunn når forbruk av vatn og kloakk skal reknast ut.

Storleik i kvm kan umogeleg indikera kor mykje vatn ein forbruker, eller kor ofte ein må trekkja i snora!

Det som forundrar meg er at kommunane i våre dagar, ikkje kan ha eit dataprogram for utrekning av gebyr, kor det vert lagt inn ein faktor for kor mange medlemmer det er i ein husstand.

Dette ville ha retta opp litt av det urettvise i dagens ordning, kor ein husstand med ein person kan måtta betala mykje meir i kommunale gebyr enn ein husstand med fleire medlemmer. Her har politikarane våre ein jobb å gjera.

Raffinert form for eigedomsskatt?

Mi rekning for 1. havår 2013 var på 5.036 kroner. For dei som vert rekna etter 111/175 kvm var den på 3.911 kroner.

Som éin person betaler eg altså 2.250 kroner meir på årsbasis. Eg meiner dette rett og slett er eigedomsskatt, for det har ingen ting med mitt forbruk av vatn og kloakk å gjera.

Eg trur vi òg er mange som reagerer på at kommunen sender ut så store rekningar med forfall 18. april. Her burde kommunen ha meir omsut for sine gamle innbyggjarar. Som kjent får ikkje pensjonistar utbetalt pensjonen sin før den 20. kvar månad.

Sølvi Søfteland