Kommunal kronekontroll i 40 år

Under ein lunsj i Oseana kafé og restaurant onsdag blei Marta Hagevik tildelt KS sitt hedersmerke for lang og tru teneste. Hagevik starta som kontorassistent 9. juli 1973, og har oppigjennom åra hatt oppgåver som skrankekasserar ved kommunekassa, fullmektig, 1. fullmektig og sekretær før ho dei siste 11 åra har gjort teneste som konsulent i skatteavdelinga i kommunen.

– Det er ikkje mange som oppnår ei så lang fartstid i kommunen som det du har gjort.

– Eg leika litt med tal før eg kom ut her og kom fram til at då du starta i kommunen ein juli-dag i 1973, så satt eg truleg i kortebukse i sandkassa og feira at eg hadde blitt fire, helsa ordførar Terje Søviknes.

Til å stola på

Søviknes har sjølv hatt 22 år i kommunal teneste, først som kommunestyrerepresentant og dei siste 14 åra som ordførar, så at dei to har treftes gjennom åra.

– Tilbakemeldingane om deg er eintydige: Marta leverar, ho er der og er til å stole på.

– Det skal vi som organisasjon veta å setje pris på, helsa ordføraren før han overrekte diplomet og nåla som synleg teikn på heidersbeviset.

– Bruk dei ufornuftig

Økonomisjef Ingrid Karin Kaalaas fekk gleda av å overrekka ei ekstra merksemd frå kommunen i form av ein sjekk.

– Det er eit velfortent heidersmerke.

– Eg skal få lov til å gje deg noko meir matnyttig i form av ei påskjønning frå kommunen.

– Du får bruka dei ufornuftig, smilte økonomisjefen til litt overraska latter frå dei kommunale økonomane, som kanskje ikkje er mest kjende for å strø rundt seg med kommunale middel.

Tek eit år om gangen

Etter fleire gode ord frå både rådmann Knut Terje Rekve og skatteoppkrevar Terje Lågeide, var tida komen for jubilanten å takka.

– Eg er overvelda, og begynte å lura på kor gamal eg eigentleg var blitt når ordføraren sa han sat i sandkassa.

– Men eg håpar eg kan halde fram i enno nokre år.

– Tida har gått fort og det har alltid vore kjekt å gå på jobb, sjølv om eg nok enkelte dager kunne ønska heile rådhuset og alle i det dit peppern gror.

– Eg gler meg til å gå på jobb kvar dag, men no tek eg eitt år om gangen, avslutta den spreke bestemora.