Kø på opning av bryggeriutsal
Bjørnafjorden Bryggeri med nytt tilskot.
Bildeserie:
Klokka ti på tolv var dei første kundane allereie på plass utanfor bryggeriet i Os Næringspark.
Det vart fort folksamt når bryggeriet no opnar utsal direkte frå bryggeriet.
• Les òg: Fekk løyve til sal over disk
Ta med growler sjølv
Tarjei Øiestad Skeie frå Bjørnafjorden Bryggeri fortel at dei allereie har hatt salsløyve ei stund, men at dei no gjer eit forsøk på eige utsal.
– Planen er å ha ope annakvar fredag til å byrja med. Konseptet er såre enkelt; ta med din eigen growler (lufttett flaske ti å transportera øl i), og fyll på her hos oss.
– Vi kan òg hjelpa deg med ein growler om du ikkje har ein sjølv, fortel Skeie.
På opningsdagen kunne bryggeriet skilta med 4 ulike produkt; Brunbjørn, Vossing, Madammen og Bitter Jol.
Kommunen på besøk
I køen som rakk ut døra fann vi mellom anna varaordførar Marie Lunde Bruarøy, næringssjef Daniel Skotheim og og næringskonsulent Jon Sivert Rykkel.
– Vi er her for å helsa på, fortel Bruarøy. Det er ei god tradisjon i Os at kommunen helsar på når nye ting vert lansert.
Næringssjef Skotheim fortel at lokalt øl er verkeleg noko han håpar å sjå som ein del av den vidare satsinga til Bjørnafjorden Matkultur.
– Vi rakk dessverre ikkje å få til noko konkret under det endå større Bjørnafjordmåltidet tidlegare i haust, men for framtida er dette noko vi må søkja å få med.
Lanserer eige øl
Som del av lanseringa i dag vil Bjørnafjorden Bryggeri i samarbeid med artist Hans Marius Johnsen òg lansera Johnsen sitt eige øl.
Johnsen sjølv tek turen innom bryggeriet i dag klokka 17.00, og rykta skal ha det til at han tek med gitaren.