Kø og trafikkaos på opningsdagen
Osingane viste seg frå kreative sider i trafikken då Bygger'n opna dørene til sitt nye varehus.
Bildeserie:
Klokka 10 i dag opna Bygger'n sitt nye varehus i Industrivegen. I god tid i forvegen var parkeringsplassen fylt opp og optimistiske tilbodsjegarar, fleire av dei med hengar på bilen, blei ståande i kø i Industrivegen.
Nokre svingte inn i motsett køyreretning enn kva som er skilta på den elles så trafikkvenlege og einvegskøyrde tomta, andre sette bilen frå seg på busslomma eller i grøfta.
Klar for vedlikehald
Fremst i køen sto Anne Røberg. Ho hadde vore tidleg ute og fått både parkeringsplass og posisjon tettast døra før opning.
– Eg har hytte i Tørrvikbygd og då treng du verktøy. Når dei har desse opningstilboda så står både trillbår og verktøykasse på ønskjelista, seier Anne.
– Det var folksamt her i går òg. Vi hadde ein kjempekveld med inviterte gjestar, fortel dagleg leiar Eivind Hodneland.
Morosam VIP-kveld
På VIP-kvelden tysdag kom det rundt 150 gjestar. Marit Voldsæter, kjent frå Kvinner på randen, sto for underhaldinga.
– Ho gjorde ein kjempejobb og stilte med skreddarsydd manus og eigen song til oss, fortel Eivind.
Les òg: På omvising veka før opning
Om Bygger'n:
• Bygger'n er ein landsdekkande byggevarekjede med cirka 100 butikkmedlemmar frå Kristiansand i sør til Vadsø i nord.
• Kjedekontoret blei etablert i 1991.
• Samla omsetnad i 2012, i sisteledd, var på 3,9 milliardar kroner.
• Bygger'n Norge, kjedekontoret, er eigd av E. A. Smith AS.
Bygger’n hadde butikk i Os frå 1998 til 2011, men så skifta Os Byggsenter kjede. No er kjeda tilbake i same gate, med 1300 kvadratmeter bygg på den 4,9 mål store tomta.