Knuste fleire hjarte
Ei vellykka fylkesmønstring i Oseana er over. Med Hjerteknuser er Idar Rolland frå Fusa blant dei som skal representera Hordaland på UKM-Festivalen i Larvik.
25.000 deltakarar frå heile Noreg har blitt til 550 representantar til UKM-Festivalen, landsfinalen, som for første gong blir arrangert utanfor Trondheim.
Årets UKM-festival går i Larvik frå 23. til 27. juni og representantane frå Hordaland blei plukka ut laurdag og søndag, ikkje i Grieghallen, men i Oseana.
Les òg: UKM på 18 minutt (video frå lokalmønstringa i Os og Fusa i februar)
– Eg er veldig stolt over oppslutnaden i Hordaland. Vi starta med 7 kommunar då fylkeskommunen overtok som UKM-arrangør i 1993. No er alle 33 kommunar representerte, sa Astrid Marthinussen, fylkeskontakt i UKM Hordaland.
– Nydeleg å vera i Oseana
UKM er 30 år i år. Astrid Marthinussen har vore med heilt sidan fylkeskommunen overtok som arrangør for 20 år sidan.
– Bortsett frå i 2000, då vi hadde fylkesmønstringa på Stord og Bømlo, har vi alltid hatt fylkesmønstringa i Grieghallen. Å koma til Oseana var svært vellykka, synest Marthinussen.
Ho er takksam for den gode dialogen med programsjef Berit Steen, som følgte heile UKM i kulturhuset i Os, og imponert over driftsteknikar Espen Hjertaas og hjelparane hans frå Os Rockeklubb.
– Ikkje berre var dei dyktige, dei jobba veldig effektivt og ingenting var noko problem.
Meir intimt, men mindre publikum
Astrid seier ho gjerne kjem tilbake til Os og Oseana med fylkesmønstringa om nokre år.
– Det var veldig flott, men samtidig intimt, med koseleg kafé, snopedisk i foajeen og mange rom som deltakarane kunne bruka til øving og venting. Dessutan kom kunstutstillinga finare fram enn i Grieghallen, der den sto i foajeen.
Det blei cirka halvparten av publikumsmengda som i Grieghallen.
– Men det var likevel til saman rundt 600 publikummarar og fullt store delar av helga, som laurdagskvelden då vi hadde rockeband. I periodar var det veldig mange deltakarar i salen også, så om det var 300 publikummarar var det samtidig gjerne over 200 deltakarar.
To frå Fusa vidare til Larvik
På scenen i Oseana sto heile 261 deltakarar fordelt på 107 sceneinnslag. 30 deltakarar på kunstutstillinga viste 34 gjenstandar, og to filmar som er laga av tilsaman fem personar blei vist. Også blant dei bak scenen, blant Unge arrangørar og nettredaksjonen, blei det delt ut billett til Larvik.
Før dei blei lest opp kven som gjekk vidare blei det delt ut prisar.
• Voss kommune fekk pris av fylket som årets turbo-kommune.
• ORBO (Ole Reinert Berg-Olsen) hadde gjeve vekk studiotid, ein dag i Hordaland Studio, og den prisen gjekk til bandet Basement frå Bergen.
• Kulturkortstipend gjekk til Helene Schmidt (2500 kroner), Peyman Azizpour (2500 kroner) og Beyond Desire (5000 kroner).
DESSE GJEKK VIDARE FRÅ UKM HORDALAND:
Film:
StrandvikFilm, Sverre Kvamme frå Fusa
Dans og teater:
Maria Furnes frå Lindås
Klassisk, pop og folkemusikk:
Eirik Sæle frå Eidfjord
Idar Rolland frå Fusa
Tiril Einarsdotter frå Stord
Band:
Basement frå Bergen
Kunst:
Anette Johnsen frå Askøy
Cassandra Hubbard frå Fjell
May Iren Aarskog Sylta frå Radøy
Konferensier: Lidvard Sandven frå Kvam.
Nettredaksjon: Iselin Absalonsen frå Bergen (+ 3 fra videoredaksjon)
Unge arrangørar: Eskil Taule, Mats Skjerve og Birk Kvalvåg.