Knuste flaske i hovudet
Brannvesenet har hatt ei roleg nyttårsvakt, politiet rykte ut på melding om masseslagsmål.
Nyttårsaftan rundt midnatt fekk politiet i Os melding om masseslagsmål på Kuven.
– Ein mann i 20-åra hadde fått ei flaske knust i hovudet, fortel politibetjent Thomas Juulseth.
Mannen blei tatt med av ambulanse til legevakt for sjekk.
Har namn å gå etter
Mannen som skal ha slått eller kasta ei flaske i hovudet på ein av dei inviterte til festen var vekke då politiet kom til staden.
– Men vi har namn å gå etter, seier Juulseth.
Det var då ei gruppe uinviterte gjestar kom til ein privatfest at det byrja å bli bråk.
– Vi har fått ulike forklaringer på kva som har skjedd, men mykje tydar på at det ha vore det vi karakteriserer som masseslagsmål på staden.
Roleg kveld hos brannvesenet
Politiet har berre fått inn éi melding relatert til fyrverkeri, den kom frå ein i Hagavik som meinte naboane ikkje var varsame nok.
Hos brannvesenet har det vore stille denne nyttårsaftan.
– Det har vore mykje fyrverkeri i Os, men vi har ikkje fått inn melding om problem eller brann nokre stadar, seier Terje Håvardstun.